საქართველოს საგარეო საქმეთა სამინისტროს განცხადებით, სტამბოლში საქართველოსა და რუსეთის მოქალაქეებს შორის დაპირისპირება თავდასხმას უკავშირდება. 17 ივნისის შემთხვევის დროს საქართველოს ერთი მოქალაქე დაიღუპა.

სამინისტროს წარმომადგენლის, ვლადიმერ კონსტანტინიდის თქმით, საფოსტო გზავნილების ოფისში, სადაც რუსეთის მოქალაქეებიც იყვნენ, შეიარაღებული კაცი შეიჭრა და იქ მყოფებს მიწაზე დაწოლა მოსთხოვა. კონსტანტინიდი ამბობს, რომ თავდასხმა შესაძლოა ე.წ. ქურდულ გარჩევას ან ძარცვას უკავშირდებოდეს, თუმცა საბოლოო მიზეზებს გამოძიება დაადგენს.

კონსტანტინიდმა დაადასტურა, რომ დაპირისპირების დროს საქართველოს მოქალაქე გარდაიცვალა, ხოლო რუსეთის ორი მოქალაქე დაიჭრა. მისივე განმარტებით, მიმალვაშია ორი პირი, ეთნიკურად ქართველია, თუმცა ჯერ არ დასტურდება, რომ საქართველოს მოქალაქეები არიან.