ცენტრალური საარჩევნო კომისიის ინფორმაციით, საქართველოს პარლამენტში მოსახვედრად 8 ოქტომბრის არჩევნებზე სულ 854 მაჟორიტარი დეპუტატობის კანდიდატი იბრძვის. მათგან 707, ანუ 82,79 პროცენტი მამაკაცია, 147 (17,21 პროცენტი) კი ქალი.

პარტიულ სიებში სულ 3 592 პირია რეგისტრირებული, მათ შორის 62,97 პროცენტი კაცი, 37,03 პროცენტი კი - ქალი. თუმცა, ცესკოს ცნობით, აღნიშნული სიების დაზუსტების პროცესი ამჟამადაც მიმდინარეობს და ეს მონაცემები შეიძლება შეიცვალოს.

ცესკოს თავმჯდომარემ, თამარ ჟვანიამ, დღეს ჟურნალისტებს წარუდგინა წინასაარჩევნო შუალედური ანგარიში, რომელიც 8 ივნისიდან პერიოდს მოიცავს და მასში შესულია ის ძირითადი აქტივობები, რასაც ცესკო ახორციელებს. ერთ-ერთი მთავარი სიახლე, რაც წლევანდელ არჩევნებზე იქნება, ხმის დათვლის პროცესი გადაიცემა ონლაინ რეჟიმში და თვალყურის დევნება ნებისმიერ მსურველს შეეძლება ცესკოს საიტზე.