ბრექსიტის რეფერენდუმის წინ განცხადებების გამო ყოფილი საგარეო საქმეთა მინისტრი და პრემიერ-მინისტრობის ერთ-ერთი მთავარი კანდიდატი, ბორის ჯონსონი სასამართლოში დაიბარეს. საქმე ეხება 2016 წელს ჯონსონის განცხადებას, რომ დიდი ბრიტანეთი ყოველკვირეულად ევროკავშირს 350 მილიონ ფუნტს აძლევს. კამპანიის პერიოდში ჯონსონი ლონდონის მერი და პარლამენტის დეპუტატი იყო.

"ჩვენ ყოველკვირეულად ვაძლევთ ევროკავშირს 350 მილიონ ფუნტს. მოდით, ეს თანხა ჩვენს ჯანდაცვას მოვახმაროთ", — ეს იყო ბრექსიტის კამპანიის ერთ-ერთი მთავარი ლოზუნგი, რომელიც სარეკლამო ბანერებზეც ხვდებოდა.

BBC ინფორმაციით, ბორის ჯონსონის წინააღმდეგ საჩივარი სასამართლოში 29 წლის ბიზნესმენმა, მარკუს ბოლმა შეიტანა, რომელმაც სასამართლო პროცესისთვის შემოწირულობის სახით 200 ათასი ფუნტი დააგროვა. ბოლი ჯონსონს სამოხელეო დანაშაულში სდებს ბრალს.

ბრიტანეთის სტატისტიკურმა სამსახურმა მაშინვე უარყო გავრცელებული ინფორმაცია. მათივე თქმით, ბრიტანეთის წლიური შენატანი ევროკავშირის ბიუჯეტში სამჯერ ნაკლებია.

ბორის ჯონსონის იურისტებმა საჩივარს "პოლიტიკური ტრიუკი" უწოდეს და ყველა ბრალდებას უარყოფენ. ისინი ამბობენ, რომ მათ კლიენტს პოლიტიკური თანამდებობა ბოროტად არ გამოუყუნებია.