მოქალაქე, რომელიც დედას სააპელაციო სასამართლოში ვერ იცავს, საკონსტიტუციო სასამართლოს სარჩელით მიმართავს. ავთანდილ კუჭავა იმ კანონის ნორმის გაუქმებას ითხოვს, რომლის მიხედვითაც სააპელაციო და უზენაეს სასამართლოებში ადვოკატის გარდა ნებისმიერ პირს წარმომადგენლობის უფლება ეზღუდება.

კუჭავა On.ge-სთან ამბობს, რომ ის საქალაქო სასამართლოში დედის ინტერესებს იცავდა, პროცესი მოიგო და საქმე სააპელაციო სასამართლოში გასაჩივრდა. მოქმედი კანონმდებლობით, მას არ შეუძლია დედის მეორე ინსტანციაში დაცვა, რადგან ნებისმიერ ადამიანს, რომელიც არ არის ადვოკატთა ასოციაციის წევრი, არ აქვს ასოციაციის მიერ მინიჭებული ადვოკატობის ლიცენზია და არ აქვს ჩაბარებული გამოცდა, წარმომადგენლობის უფლება ეკრძალება.

"ასოციაციის წევრობა მე არ მინდა, მე მინდა უშუალოდ დავიცვა დედა და ამიტომ, ეს იქნება მთავარი ბირთვი სარჩელის, რომ ამის უფლებას რომ არ მაძლევთ, ეს არის არაკონსტიტუციური. არ მჭირდება არანაირი საბუთი, ნებართვა, ლიცენზია იმისთვის, რომ დედაჩემს დავუმტკიცო, კარგი იურისტი რომ ვარ", — ამბობს კუჭავა.

ის აცხადებს, რომ სარჩელის მთავარი მიზანია, ადამიანს სასამართლოში წარმომადგენლად ჰყავდეს ის, ვისაც ენდობა და არა ის, ვისაც ლიცენზია აქვს. მისივე განმარტებით, ამ აკრძალვას საპროცესო კანონმდებლობა და ადვოკატის შესახებ კანონი აწესებს. მისი თქმით, ეს აკრძალვა მხოლოდ ფიზიკურ პირებზე ვრცელდება და იურიდიულ პირს თავის საქმეზე შეუძლია, სამივე ინსტანციაში ის წარადგინოს, ვინც სურს.