ტაილანდის მეფემ, მაჰა ვაჩირალონგკორნმა თავისი დაცვის წევრზე, სუთიდა ტიჯაიზე მოულოდნელად იქორწინა და მას დედოფლის ტიტული მიანიჭა. როგორც The Guardian წერს, ცერემონია მეფის ოფიციალურ კორონაციამდე სამი დღით ადრე მოხდა.

2014 წელს სუთიდა ტიჯაი, რომელიც მანამდე Thai Airways-ის ბორტგამცილებელი იყო, მეფის პირადი დაცვის უფროსის მოადგილედ დაინიშნა. ორი წლის შემდეგ კი ის არმიის გენერალი გახდა.

ფოტო: EPA

სუთიდა ტიჯაი მოვალეობების შესრულების დროს ბანგკოკში მიმდინარე თვის დასაწყისში

ფოტო: Rungroj Yongrit/EPA

მოულოდნელი ცერემონიის შესახებ გაზეთებიდან გახდა ცნობილი, ხოლო პირველ მაისს ქორწინების კადრები ტელევიზიით გავრცელდა. მაჰა ვაჩირალონგკორნი, იგივე რამა X ტახტზე მას შემდეგ ავიდა, რაც 70 წლიანი მმართველობის შემდეგ მამამისი 2016 წლის ოქტომბერში გარდაიცვალა.

1932 წლიდან ტაილანდი საკონსტიტუციო მონარქიაა, თუმცა სამეფო ოჯახს დღემდე დიდი გავლენა და სიმდიდრე აქვს, ხოლო მეფე ერის სულიერ დამცველად მიიჩნევა. გარდა ამისა, კანონის მიხედვით, ტაილანდის მეფე კრიტიკისგან არის დაცული.