CNN-ის ცნობით, ვენესუელაში ტელეკომპანიის მაუწყებლობა დაბლოკეს. როგორც მედიასაშუალება იუწყება, ვენესუელის კომუნიკაციების მარეგულირებელმა საკაბელოებისთვის ტელევიზიის გათიშვის განკარგულება გასცა.

CNN წერს, რომ ტელევიზია მას შემდეგ გათიშეს, რაც კარაკასში სამხედრო მანქანის დემონსტრანტების ჯგუფში შევარდნის კადრები გავიდა ეთერში. სიგნალის გათიშვასა და კადრების ჩვენებას შორის სხვაობა 1 წუთი იყო.

ვენესუელაში მიმდინარე დაპირისპირების შედეგად 52 ადამიანი დაშავდა. ისინი კარაკასის საავადმყოფოში გადაიყვანეს.

52 დაშავებული ადამიანიდან, 32 რეზინის ტყვიების შედეგად დაშავდა,16 დაშავებულს ტრავმები აქვს მიყენებული, სამ მათგანს რესპირატორული გართულებები.

კარაკასში დაპირისპირებები ამ დრომდე გრძელდება. ვენესუელაში დემონსტრანტების წინააღმდეგ ცრემლსადენი გაზი გამოიყენეს. მასობრივი გამოსვლები ვენესუელაში მას შემდეგ განახლდა, რაც 30 აპრილს ოპოზიციის ლიდერმა გაავრცელა ვიდეო, რომელშიც სამხედროებთან ერთად ჩანს და ამბობს, რომ ბრძოლის ფინალური ფაზა დაიწყო. ხუან გუაიდომ მოსახლეობას მასობრივი პროტესტისკენ მოუწოდა.