ვენესუელაში ხუან გუაიდოს მხარდამჭერ დემონსტრაციაზე ეროვნული გვარდიის ჯავშანტექნიკა შეიჭრა. მედიაში გავრცელებულ კადრებში ჩანს, რომ აქციის ტერიტორიაზე შესულ მძიმე სამხედრო ტექნიკას დემონსტრანტები სხვადასხვა ნივთებს სვრიან.

ვენესუელაში მიმდინარე დაპირისპირების შედეგად 52 ადამიანი დაშავდა. ისინი კარაკასის საავადმყოფოში გადაიყვანეს.

52 დაშავებული ადამიანიდან, 32 რეზინის ტყვიების შედეგად დაშავდა,16 დაშავებულს ტრავმები აქვს მიყენებული, სამ მათგანს რესპირატორული გართულებები.

კარაკასში დაპირისპირებები ამ დრომდე გრძელდება. ვენესუელაში დემონსტრანტების წინააღმდეგ ცრემლსადენი გაზი გამოიყენეს. მასობრივი გამოსვლები ვენესუელაში მას შემდეგ განახლდა, რაც 30 აპრილს ოპოზიციის ლიდერმა გაავრცელა ვიდეო, რომელშიც სამხედროებთან ერთად ჩანს და ამბობს, რომ ბრძოლის ფინალური ფაზა დაიწყო. ხუან გუაიდომ მოსახლეობას მასობრივი პროტესტისკენ მოუწოდა.