საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს სხდომაზე ტელევიზიის დირექტორს ნათია კაპანაძეს უსმენენ. საბჭოს წევრები დირექტორისგან პირველი კვარტლის შესრულების ანგარიშს მოისმენენ, რომელიც ფინანსურ და შინაარსობრივ ნაწილს ეხება.

აჭარის ტელევიზიის ცნობით, მრჩეველთა საბჭოს წვერებს კითხვები ექნებათ სამი თვის საანგარიშო პერიოდთან დაკავშირებით.

მრჩეველთა საბჭოს თავმჯდომარის, ნატა იმედაიშვილის ცნობით, დღევანდელ სხდომაზე ნათია კაპანაძის იმპიჩმენტის საკითხს არ განიხილავენ. მისივე განმარტებით მათ ამისთვის 10 დღიანი ვადა აქვთ. ამ პერიოდში კი მრჩეველთა საბჭოს წევრებმა უნდა მოისმინონ მხარეთა არგუმენტები.

რაც შეეხება პირველი კვარტლის ანგარიშს, დოკუმენტში ძირითადად საუბარია ამ პერიოდში მაუწყებლის მიერ მიღწეულ შედეგებსა და გამოწვევებზე. დოკუმენტის მიხედვით, პირველი კვარტლის მთავარ ამოცანაა არხის შენობის საკითხზე კონსულტაციების გაგრძელება, გაზაფხულის სეზონისთვის მომზადება, მათ შორის შეფუთვა, ტექნიკის შეძენა და რადიო სიხშირეების გამოყენება ახალ მინიჭებულ უბნებზე.

მიღწევების მხრივ დოკუმენტში აღნიშნულია საპრეზიდენტო არჩევნების შეფასება ეუთოს სადამკვირვებლო მისიის მიერ, მაუწყებლის ინფრასტრუქტურული პრობლემების გადაჭრის კუთხით განხორციელებულია აქტივობები, მთავარ სირთულედ კი არხის ტექნიკური პრობლემები სახელდება.

კაპანაძის იმპიჩმენტის მოთხოვნა

ნათია კაპანაძის იმპიჩმენტი მრჩეველთა საბჭოს ორმა წევრმა მოითხოვა. მათ შორისაა ირაკლი დარცმელიძე, რომელიც ნაციონალური მოძრაობის კვოტით არის წარდგენილი და გიგა ჩხარტიშვილი, რომელიც ქართული ოცნების კვოტითაა საბჭოში.

საბჭოს თავმჯდომარემ ნატა იმედაიშვილმა On.ge-ს უთხრა, საბჭოს წევრებს პრეტენზიები აქვთ პრიორიტეტების შეუსრულებლობაზე, ხელფასების პრობლემასა და თანამშრომლის სამსახურიდან გათავისუფლებაზე. მისი თქმით, დოკუმენტს არ გაცნობია და პოზიციას ვერ დააფიქსირებს, თუმცა კაპანაძის დირექტორობის პერიოდში არსებული პრობლემების განხილვისას თავადაც იგივე საკითხებს ასახელებს.

კაპანაძის იმპიჩმენტისთვის გადამწყვეტი იმედაიშვილის ხმაა, რადგან საბჭოს სხვა წევრები ამბობენ, რომ დირექტორის წინააღმდეგ ხმის მიცემას არ აპირებენ.

თავად კაპანაძემ განაცხადა, რომ საფრთხე ექმნება სარედაქციო დამოუკიდებლობას და მაუწყებლის გამართულ მუშაობას. მისი თქმით, მაუწყებელი პრიორიტეტებს იმ შესაძლებლობების ფარგლებში ასრულებს, რაც აქვთ. მისივე თქმით, ტელევიზიის რეიტინგს ფილმები წერდა, თუმცა ფილმები ვერ შეცვლის ქედასა და ხულოში ადამიანების ცხოვრებას.

სარედაქციო დამოუკიდებლობის საფრთხეზე საუბრობს აჭარის ტელევიზიაც. მაუწყებლის გავრცელებულ განცხადებაში აღნიშნულია, რომ მიმდინარე პროცესები უპირისპირდება სარედაქციო დამოუკიდებლობას და მთლიანად საზოგადოებრივი მაუწყებლის იდეას.

კაპანაძის იმპიჩმენტის ინიაციტივად არასამთავრობო ორგანიზაციები მკვეთრად უარყოფითად აფასებენ. ნათია კაპანაძეს მხარი დაუჭირა საქართველოს სახალხო დამცველმაც.

ამავე თემაზე: