კანადელი სერიული მკვლელის წიგნი ამაზონზე მისი გამოქვეყნებიდან რამდენიმე საათში საიტმა აიღო.

რობერტ პიკტონი ყოფილი მულტიმილიონერია. მას კანადაში ღორების ფერმა ჰქონდა. ის 2002 წელს დააკავეს და 2007 წელს 6 ქალის მკვლელობა დაუმტკიცეს. 20 სხვა მკვლელობის საქმეზე კი სასჯელი დროებით შეუჩერეს.

რობერტ პიკტონს სხვა პატიმარი დაეხმარა, რომ არალეგალურად გამოეცა პატიმრობის დროს დაწერილი წიგნი, რომელიც სერიული მკვლელის მოგონებებს ასახავდა. CTV-ის ინფორმაციით, მემუარებში პიკტონი თავის უდანაშაულობას ამტკიცებს.

ფოტო: ParcelBright

კანადის რეგიონის ოფიციალურმა წარმომადგენელმა მაიკ მორისმა განაცხადა, რომ, შემაშფოთებელია სერიული მკვლელის წიგნის გაყიდვა და ამაზონს მისი საიტიდან აღებისკენ მოუწოდა.

"შეცდომაა, ადამიანმა სარგებელი მიიღოს იმ საქციელით, რითაც უამრავ ადამიანს ტკივილი მოჰგვარა", - თქვა მორისმა სიტყვით გამოსვლისას.

BBC-ის მიხედვით, რობერტ პიკტონის პირველი მსხვერპლი ქალი 1983 წელს გაუჩინარდა. საზოგადოება პოლიციას პასიურობაში ადანაშაულებდა. 2002 წელს სამართალდამცავებმა პიკტონის ფერმაში მოკლული ქალების ნაშთებს მიაკვლიეს.

პიკტონის საქმე კანადის ისტორიაში ერთ-ერთი ყველაზე ძვირადღირებულია, რადგან მის გამოძიება ბრიტანეთის კოლუმბიის მთავრობას $102 მილიონი დაუჯდა. საქმე 2007 წელს გაიხსნა და მოსამართლემ პრეცენდენტი საშინელებათა ფილმს შეადარა. პიკტონი ქალებს კლავდა და მათ ნაწილებს თავის ღორებს აჭმევდა.

სერიულ მკვლელს მხოლოდ 6 ქალის მკვლელობა დაუმტკიცდა იმის მიუხედავად, რომ პროკურატურამ სასამართლო პროცესზე მტკიცებულებად წარადგინა ჩვენება, რომლის მიხედვითაც პიკტონმა ციხეში შეპარულ გადაცმულ დეტექტივთან 49 ქალის მკვლელობა აღიარა.

რობერტ პიკტონს სამუდამო პატიმრობა აქვს მისჯილი და მისი საქმე ხელახლა განხილვას არ ექვემდებარება.