შინაგან საქმეთა სამინისტრომ კასპში ქურდობის სამ საქმეზე ერთი პირი დააკავა. გამოძიების ინფორმაციით, ბრალდებულმა კასპის მუნიციპალიტეტის სოფელ ბარნაბიანთკარში მოქალაქეების საცავსა და ორ საცხოვრებელ სახლში უკანონოდ შეაღწია და ნივთები მოიპარა.

უწყების განცხადებით, პოლიციამ ნაქურდალი ნივთები ნივთმტკიცებად ამოიღო. მათივე თქმით, დაკავებული ჩადენილ დანაშაულს აღიარებს.

გამოძიება ბინასა და სადგომში უკანონო შეღწევით ჩადენილ ქურდობის საქმეზე საქართველოს სსკ-ის 177-ე მუხლის მე-2 ნაწილის "ბ" ქვეპუნქტით და მე-3 ნაწილის "გ" ქვეპუნქტით მიმდინარეობს. ჩადენილი დანაშაული 4-დან 7 წლამდე ვადით თავისუფლების აღკვეთას ითვალისწინებს.