საფეხბურთო კლუბმა ლესტერ სიტიმ, გუნდის არსებობის 123 წლიანი ისტორიის მანძილზე პირველად, ინგლისის პრემიერ ლიგა მოიგო.

2014 წელს გუნდი 10 წლიანი პაუზის შემდეგ დაუბრუნდა ინგლისის ტოპ დივიზიონს.

2014-2015 წლის სეზონი გუნდისთვის იღბლიანი არ გამოდგა, 29 თამაშის შემდეგ ლესტერს მხოლოდ 19 ქულა ჰქონდა და ცხრილის ბოლო ადგილზე იმყოფებოდა. თუმცა, გუნდმა საოცრება შეძლო და დარჩენილი 9 თამაშიდან 7 მოიგო, რის შედეგადაც 41 ქულით მე-14-ე ადგილზე გავიდნენ და მომავალ სეზონში პრემიერ ლიგაში თამაშის უფლება მოიპოვეს.

ლესტერ სიტი იმ გუნდების კატეგორიას მიეკუთვნება, რომელიც ტოპ ლიგაში სტაბილურად არ თამაშობს და ფეხბურთის მოყვარულები მათგან ლიგებს შორის მუდმივ როტაციას ელიან, შესაბამისად გუნდის ასეთ წარმატებას არავინ ელოდა. სეზონის დასაწყისში ბუკმეიკერები გუნდის მიერ ლიგის მოგების შანსებს 5000/1-თან აფასებდნენ.

ლესტერს აქამდე ქვედა დივიზიონები რამდენჯერმე აქვს მოგებული, გუნდი ჯამში 7 ტიტულს ფლობდა. ისინი ექვსჯერ გახდნენ ინგლისის ჩემპიონატის რანგით მესამე ლიგის მეორე დივიზიონის ჩემპიონები და ერთხელ ჩემპიონშიპის - რანგით მეორე ლიგა. მათ ასევე მოგებული აქვთ ლიგის თასი - სამჯერ.

კლუბი ჩემპიონობამდე იტალიელმა მწვრთნელმა კლაუდიო რანიერიმ მიიყვანა. ის გუნდის ხელმძღვანელად 2015 წლის 13 ივლისს დაინიშნა და 2015-2016 წლის სეზონის პირველ თამაშში სანდერლენდთან, 4-2 გაიმარჯვა.

რანიერი ლესტერამდე ისეთი გუნდების მწვრთნელი იყო როგორებიცაა, ფიორენტინა, ვალენსია, ჩელსი, რომა, იუვენტუსი, ინტერი, მადრიდის ატლეტიკო, საბერძნეთის ნაკრები და ა.შ. ასეთი რანგის ტიტული რანიერისთვისაც პირველია, როგორც ლესტერს მას მანამდეც აქვს მოგებული რამდენიმე ქვედა ლიგა და სხვადასხვა ქვეყნის თასები, მაგრამ ტოპ ლიგის ჩემპიონი ის პირველად გახდა.

ლესტერ სიტის ერთ-ერთი გამორჩეული მოთამაშე ჯეიმი ვარდია, რომელიც გუნდში 2012 წელს ინგლისის რანგით მესამე დივიზიონში მოასპარეზე ფლიტვუდ თაუნიდან 1 მილიონი ფუნტის სანაცვლოდ გადავიდა.

საჩემპიონო სეზონში ვარდიმ 34 თამაშში 22 გოლი გაიტანა. 2015-2016 წლის პრემიერ ლიგაში თამაშისას მან რეკორდიც კი დაამყარა, ზედიზედ 11 თამაშში გაიტანა გოლი, წინა რეკორდი მანჩესტერ იუნაიტედის თავდამსხმელს, რუდ ვან ნისტელროის ეკუთვნოდა.

ვარდის სატრანსფერო ფასი ამჟამად 12 მილიონი ევროა, ის ინგლისის ეროვნულ ნაკრებშიც კი გამოიძახეს, სადაც 6 თამაშში 2 გოლი გაიტანა.

მომავალ სეზონში, პირველად არსებობის ისტორიაში, ლესტერი ჩემპიონთა ლიგაში ითამაშებს.

აქამდე გუნდს ევროპულ ტურნირებზე სამჯერ აქვთ ნათამაშები, ერთხელ ევროპის თასების მფლობელთა თასის გათამაშებაზე და ორჯერ უეფას თასზე.