ანალიტიკური გამოცემა 38 North-ის ინფორმაციით, ჩრდილოეთ კორეაში სოხეს, იგივე ტონჩხანის ბაზაზე, რომლის დემონტაჟიც უნდა მომხდარიყო, აღდგენითი სამუშაოები მიმდინარეობს.

ბაზას თანამგზავრების გაშვებისთვის და ძრავის ტესტირებისთვის იყენებდნენ. ორ მარტს თანამგზავრიდან მიღებულ ფოტოებში ჩანს, რომ ტერიტორიაზე ახალი შენობები გაჩნდა.

2018 წელს ჩრდილოეთ და სამხრეთ კორეის ლიდერებმა გამოაცხადეს, რომ ტონჩხანში სარაკეტო ბაზისა და გამშვები პუნქტის დემონტაჟი მოხდებოდა. გარდა ამისა, ადგილზე უცხოელი დამკვირვებლები უნდა შესულიყვნენ, თუმცა ისინი ამ დრომდე არ გამგზავრებულან.

27-28 თებერვალს ვიეტნამის ქალაქ ჰანოიში ჩრდილოეთ კორეის ლიდერი და აშშ-ს პრეზიდენტის მეორე სამიტი გაიმართა. მოლაპარაკებები დროზე ადრე შეთანხმების გარეშე დასრულდა.

პრეზიდენტმა დონალდ ტრამპმა სამიტის შემდგომ პრესკონფერენციაზე განაცხადა, რომ შეუთანხმებლობის მიზეზი სანქციები გახდა. მისივე თქმით, ჩრდილოეთ კორეამ სანქციების სრულად მოხსნა ითხოვა, რაზეც აშშ-მ უარი თქვა.

თავის მხრივ ჩრდილოეთ კორეა აცხადებს, რომ სანქციების არა სრულად, არამედ ნაწილობრივ მოხსნას ითხოვდა. მათივე თქმით, ქვეყანას რეალური წინადადება ჰქონდა, რომელიც აშშ-ს დაკვირვების ქვეშ ბირთვული კვლევით ცენტრის განიარაღებას მოიცავდა.

5 მარტს აშშ-ს პრეზიდენტის მრჩეველმა უშიშროების საკითხებში ჯონ ბოლტონმა განაცხადა, რომ ჩრდილოეთ კორეას შესაძლოა, ახალი სანქციები დაეკისროს.