თბილისის მერიის ინფორმაციით, მუნიციპალური ავტოპარკის განახლების პირველ ეტაპზე სექტემბრის ბოლოდან მხოლოდ 10 ახალი ავტობუსი შემოვა. დანარჩენი 143 ავტობუსი დედაქალაქში შემდეგი 7 თვის განმავლობაში ეტაპობრივად უნდა შემოვიდეს. როგორც მერია აცხადებს, მათ აქვთ ავტობუსების განახლების ოთხწლიანი გეგმა. თბილისის სატრანსპორტო კომპანიის ინფორმაციით, დედაქალაქს 700-მდე ავტობუსი ემსახურება.

მერიის ინფორმაციით, ქალაქის მერი პოლონეთში იმყოფება, სადაც ის ავტომწარმოებელი კომპანია MAN-ის ქარხანაში იმყოფებოდა და დაათვალიერა, თუ როგორ იწყობა თბილისის დედაქალაქისთვის განკუთვნილი ავტობუსები.

ახალი ავტობუსები ადაპტირებულია შშმ პირებისთვის და საწვავად იყენებენ ბუნებრივ აირს.

ავტობუსების პროექტის მხარდაჭერის ხელშეკრულებას თბილისის მერიასა და ევროპის რეკონსტრუქციისა და განვითარების ბანკს (EBRD) შორის 2016 წლის დასაწყისში მოეწერა ხელი. მემორანდუმის თანახმად, EBRD მერიას ავტობუსების შესაძენად 27 მილიონ ევროს გამოუყოფს.