უკრაინის მართლმადიდებელი ეკლესიის წინამძღოლის ტახტზე მიტროპოლიტ ეპიფანეს აღსაყდრების ცერემონია შედგა. ცერემონია დღეს, 3 თებერვალს წმინდა სოფიას სახელობის ტაძარში გაიმართა. ცერემონიას დაესწრო უკრაინაში საქართველოს ელჩი, გელა დუმბაძეც.

უკრაინის ეკლესიის მეთაურად მიტროპოლიტ ეპიფანეს აღსაყდრებას წინ უსწრებდა მისი რუსეთის ეკლესიიდან გამოყოფა. 6 იანვარს სტამბოლში წმინდა გიორგის ტაძარში მსოფლიო პატრიარქმა ბართლომემ უკრაინის მართლმადიდებელი ეკლესიის წინამძღოლს ტომოსი ანუ ბრძანება გადასცა. ამით, უკრაინის ეკლესია ოფიციალურად გამოეყო რუსეთის ეკლესიას და ფორმალურად გაფორმდა ოქტომბერში მიღწეული შეთანხმება, ავტოკეფალიის მინიჭებაზე.

კიევის პატრიარქმა, ფილარეტმა ჯერ კიდევ სექტემბერში, შეთანხმების მიღწევამდე განაცხადა, რომ ავტოკეფალიის საკითხზე საქართველოს მხარდაჭერას ელოდება. "საქართველოს ეკლესიას უნდა ახსოვდეს თავისი ისტორია", — აღნიშნა მან.

თუმცა, საქართველოს საპატრიარქომ პოზიციის დაფიქსირებას თავის შეკავება არჩია. ამის მიზეზად კი ის დაასახელა, რომ კანონიკური სამართლის ნორმებზე დაფუძნებული თითოეული მხარის ოფიციალურ და საბოლოო პოზიციას ელოდებოდა. მაშინ პატრიარქის მდივანმა, მიქაელ ბოტკოველმა აღნიშნა, რომ საკითხზე სინოდის სხდომაზე იმსჯელებდნენ. თუმცა, მანვე აღნიშნა, რომ ოკუპაციის პირობებში კონსტანტინოპოლის ეკლესიის უპირობო მხარდაჭერა არასწორი იქნებოდა.

ამ ეტაპამდე უცნობია საქართველოს მართლმადიდებელი ეკლესიის პოზიცია. მის აზრს ელოდება საქართველოს ხელისუფლებაც.