თბილისის ტექნოპარკში დღეს ევროპის საბჭოს (CoE), ინტერნეტ საზოგადოების (ISOC), სახელებისა და ნომრების ინტერნეტ-კორპორაციისა (ICANN) RIPENCC-ის მხარდაჭერით ინტერნეტმმართველობის ფორუმი ტარდება.

ფორუმი ეკონომიკისა და მდგრადი განვითარების მინისტრის მოადგილე დავით ხუციშვილმა და კომუნიკაციების ეროვნული კომისიის თავმჯდომარე ვახტანგ აბაშიძემ გახსნეს. ფორუმზე დღის წესრიგის შესახებ მოლაპარაკებებს აწარმოებენ როგორც არასამთავრობო ორგანიზაციები, ასევე, სახელმწიფოს წარმომადგენლები.

ღონისძიების ერთ-ერთი ორგანიზატორი, საქართველოს მცირე და საშუალო სატელეკომუნიკაციო ოპერატორების ასოციაციის დირექტორი, უჩა სეთური აცხადებს, რომ ფორუმის მთავარი მიზანია ინტერნეტი არ გახდეს სახელმწიფოს ხელში ინსტრუმენტი:

"IGF-ის მთავარი იდეა არის ის, რომ ინტერნეტი არ გახდეს ინსტრუმენტი სახელმწიფოების ხელში, რომ სახელმწიფომ მოუსმინოს ადამიანებს, ტექნიკურ საზოგადოებას, ვინც ინტერნეტი გამოიგონა, ასევე, მოუსმინოს მედიას, სამოქალაქო საზოგადოებას. ესაა ამ ყველაფრის დედააზრი და ამიტომაა მნიშვნელოვანი. წელს არის მეორე ფორუმი. პირველი შარშან ჩატარდა დეკემბერში და წელს უკვე უფრო გაიზარდა ეს ფორუმი და განსახილველ საკითხთა წრეც გაფართოვდა.

უჩა სეთურის თქმით, ფორუმის ორგანიზებისას პრობლემაა დღის წესრიგზე მოლაპარაკება, თუ ვინ იქნებიან სპიკერები, როგორ მოხდება თემის გაშლა და ა.შ. იგი რეგიონში ამ მხრივ მდგომარეობას აფასებს და აცხადებს, რომ სამწუხაროდ, მეზობლების დასმა ერთ მაგიდასთან ვერ მოხერხდა, თუმცა იყო მცდელობა, რომ მეზობელ ქვეყნებს ერთად ემსჯელათ რიგ საკითხებზე.

ინტერნეტმმართველობის ფორუმი შარშან დეკემბერშიც ჩატარდა. მისი ძირითადი საკითხებია:

  • რეგიონების ინტერნეტიზაცია;
  • ელექტრონული მმართველობა;
  • საავტორო უფლებები ინტერნეტში;
  • პერსონალური მონაცემების დაცვა;
  • ახალი მედიის რეგულაციები ინტერნეტში;
  • ინტერნეტი და ბავშვები;
  • ინტერნეტ დომენების მართვასთან დაკავშირებული საკითხები;