ზუგდიდის რაიონულმა სასამართლომ გაუპატიურებასა და ქორწინების იძულებაში ბრალდებული პირი დამნაშავედ სცნო და სასჯელის სახედ და ზომად განესაზღვრა თავისუფლების აღკვეთა 7 წლის ვადით.

პროკურატურის მტკიცებით, ბრალდებული 2016 წლის 21 მარტს, დღის საათებში ზუგდიდის რაიონის ერთ-ერთ სოფელში შეხვდა ნ.ჯ-ს და ქორწინება შესთავაზა. მას შემდეგ, რაც უარი მიიღო, ორი დღის განმავლობაში ცდილობდა ნ.ჯ-ს წინააღმდეგობა დაეძლია. იგი მუქარით, ფიზიკური და ფსიქიკური ძალადობით აიძულებდა ნ.ჯ-ს მასთან ქორწინებას.

გამოძიების ვერსიით, 2016 წლის 22 მარტს, მან ღამის საათებში, იძულებით მიიყვანა ნ. ჯ. ერთ-ერთ სასტუმროში, სადაც ძალადობით და ძალადობის გამოყენების მუქარით მასთან დაამყარა სქესობრივი კავშირი.

სამართალდამცველებმა მამაკაცი 2016 წლის 11 აპრილს, წალენჯიხის რაიონის სოფელ ლიაში დააკავეს.

ზუგდიდის რაიონულმა პროკურატურამ მას ბრალდება წარუდგინა საქართველოს სისხლის სამართლის კოდექსის 137-ე მუხლის პირველი ნაწილით, რაც გაუპატიურებასა და 1501-ე მუხლის პირველი ნაწილით, ქორწინების იძულებას გულისხმობს.