პატრიარქის საშობაო ეპისტოლეში, რომელიც სამების ტაძარში წაიკითხეს, სკოლაზე და განათლების სისტემაზეცაა საუბარი. პატრიარქი წერს, რომ იცის, რა პრობლემებია დღეს სკოლებში, თუმცა ამ პრობლემების ფონზე, სასიხარულო ფაქტად მოიხსენიებს იაკობ გოგებაშვილისეული დედაენის სკოლებში დაბრუნებას.

"განსაკუთრებული ზრუნვა გვმართებს მომავალ თაობაზე, რათა შემდეგ მათ საყვედური არ გვითხრან, რომ არ დავეხმარეთ, გაცნობიერებული ნაბიჯები გადაედგათ თავისი ცხოვრების გზაზე. მე ურთიერთობა მაქვს პედაგოგებთან და ნაწილობრივ ვიცი ის პრობლემები, რის წინაშეც დღეს საჯარო სკოლა დგას. სასიხარულოა, რომ ხელისუფლებამ განაცხადა, რომ მასწავლებელთა ხელფასს გაზრდის და იზრუნებს მათი ავტორიტეტის ამაღლებისთვის; ასევე სასიხარულოა დაწყებით კლასებში დედაენის დაბრუნება, მაგრამ გასაკეთებელი კვლავ ბევრია", — ნათქვამია პატრიარქის საშობაო ეპისტოლეში.

საქართველოს პარლამენტის საფინანსო-საბიუჯეტო და განათლების, მეცნიერებისა და კულტურის კომიტეტებმა მხარი დაუჭირეს პარლამენტის წევრების, ზაზა გაბუნიასა და მარიამ ჯაშის საკანონმდებლო ინიციატივას, რომლითაც დედაენა კანონის დონეზე ხელშეუხელები გახდება. კანონპროექტი პარლამენტის პლენარულს ხდომაზეც პირველი მოსმენით უკვე განიხილეს დ მხარი დაუჭირეს.

განმარტებითი ბარათის მიხედვით, კანონპროექტის მიზანია, იაკობ გოგებაშვილის დედაენა ფორმალურ განათლებაში დაინერგოს და ბავშვებმა სწორედ ამ წიგნით ისწავლონ.

ამ მიზნით, დეპუტატები ზოგადი განათლების შესახებ საქართველოს კანონში ცვლილებას გეგმავენ, რომლის მიხედვითაც განათლების სამინისტრო შექმნის ექსპერტთა კომისიას. აღნიშნული კომისია, დედაენას, რომელსაც არამატერიალური ძეგლის სტატუსი აქვს მინიჭებული, გრიფირებაზე წარსადგენად მოამზადებს. დედაენის გრიფირება სპეციალური წესით მოხდება და არა ზოგადით.

პარლამენტში კანონპროექტის მოტივაციასაც განმარტავენ და ამბობენ, რომ საქართველო მიერთებულია არამატერიალური კულტურული მემკვიდრეობის დაცვის შესახებ საერთაშორისო კონვენციას. ეს კონვენცია არამატერიალური კულტურული მემკვიდრეობის ძეგლების არა მხოლოდ დაცვას არამედ პრაქტიკაში დანერგვასაც გულისხმობს.

ამავე თემაზე: