აშშ-ის პრეზიდენტის, დონალდ ტრამპის გადაწყვეტილებით გაეროში აშშ-ს მუდმივი წარმომადგენელი Fox-ის ყოფილი ტელეწამყვანი და სახელმწიფო მდივნის მოადგილე, ჰიზერ ნოიერტი იქნება. მისი კანდიდატურა სენატში უნდა დაამტკიცონ, სადაც უმრავლესობას რესპუბლიკელები ფლობენ.

გაეროში მუდმივმა წარმომადგენელმა ნიკი ჰეილიმ ოქტომბერში თქვა, რომ თანამდებობას წლის ბოლოს დატოვებდა. ის ამ პოზიციაზე 2017 წლის იანვრიდან მუშაობდა.

48 წლის ჰიზერ ნოიერტი სახელმწიფო დეპარტამენტში პრესსამსახურის ხელმძღვანელად 2017 წლის აპრილიდან მუშაობდა, იმ დროს სახელმწიფო მდივანი ჯერ კიდევ რექს ტილერსონი იყო. მას შემდეგ რაც ტილერსონი მაიკ პომპეომ შეცვალა, ნოიერტი ხშირად დაჰყვება მას მივლინებებში და მალევე საზოგადოებასთან ურთიერთობის საკითხებში პომპეოს მოადგილე გახდა.

სახელმწიფო სამსახურამდე ნოიერტი მუშაობდა Fox-ზე და მიჰყავდა გადაცემა Fox and friends. შემდგომში ტრამპმა აღიარა, რომ გადაცემას ხშირად უყურებდა და ტელეწამყვანს აქებდა.