საპრეზიდენტო არჩევნების მეორე ტურის სამუშაო დღეს, 28 ნოემბერს დანიშვნის გასაჩივრება შესაძლებელია, თუმცა ვადა შეზღუდულია. საარჩევნო კოდექსი ცესკოს მიღებული განკარგულების გასაჩივრებისთვის 2 კალენდარულ დღეს ითვალისწინებს.

როგორც On.ge-ს ახალგაზრდა იურისთა ასოციაციის დირექტორმა, ირმა პავლიაშვილმა განუმარტა გასაჩივრების უფლება არჩევნებში მონაწილე სუბიექტებს, სადამკვირვებლო ორგანიზაციებს და იმ პირებს აქვთ, ვისაც ეს განკარგულება აზიანებს. მათ შორის ადგილობრივ ამომრჩევლებსა და ემიგრანტებს. კერძოდ, მოქალაქემ უნდა დაასაბუთოს, რომ მის ინტერესს ზიანი ადგება და სასამართლოში სარჩელი შეიტანოს, სასამართლო კი გადაწყვეტს, მიიღებს თუ არა საქმეს წარმოებაში.

ცენტრალურმა საარჩევნო კომისიამ საპრეზიდენტო არჩევნების მეორე ტური სამუშაო დღეს, 28 ნოემბერს დანიშნა. მიუხედავად სხდომის რამდენიმე წევრის წინააღმდეგობისა, ცესკომ გადაწყვეტილება არ შეცვალა. მანამდე საარჩევნო ადმინისტრაციას არჩევნების შაბათ-კვირას დანიშვნისკენ მოუწოდა არასამთავრობო სექტორმაც.

მათ ის პრობლემებიც დაასახელეს, რასაც არჩევნების სამუშაო დღეს დანიშვნა გამოიწვევდა. მათ შორისაა ემიგრანტების ჩართულობა, შიდა მიგრაცია და არჩევნებზე გავლენა. ცესკოში გადაწყვიტეს იმისთვის, რომ მიგრანტებს ხმის მიცემის პრობლემა არ შეექმნათ უცხოეთში საარჩევნო უბნები ადგილობრივი დროით 12 საათამდე იმუშავებენ.