ზაზა სარალიძის დედის მდგომარეობა სტაბილურია. ამის შესახებ On.ge-ს ინგოროყვას კლინიკაში განუცხადეს.

საავადმყოფოს პრესსამსახურის ინფორმაციით, ზაზა სარალიძის დედას გლუკოზის დონე (ე.წ. შაქარი) აქვს მაღალი და მას რამდენიმე საათში გაწერენ.

სარალიძის დედა ცუდად რამდენიმე საათის წინ გახდა. მიზეზი მის შვილის, შვილმოკლული მამის, ზაზა სარალიძის სამართალდამცავებთან დაპირისპირება იყო. სარალიძეს კარვის გაშლის უფლება დღესაც შეუზღუდეს.

რამდენიმე დღის წინ შვილმოკლულმა მამამ, ზაზა სარალიძემ თბილისის მერიისგან წერილი მიიღო, სადაც აღნიშნული იყო, რომ თბილისში, პარლამენტის შენობის მიმდებარე ტერიტორია უნდა დაეტოვებინა. მიზეზი ახალი წლისთვის ნაძვის ხის დადგმა იყო.

ამ საკითხთან დაკავშირებით დასმული კითხვის საპასუხოდ თბილისის მერმა, კახა კალაძემ განაცხადა, რომ დედაქალაქი საახალწლოდ ემზადება და ამ ადგილის გამოყენება შეუძლებელი იქნება. როგორც მერი განმარტავდა, აქციის მონაწილეებს შეუძლიათ სხვა ადგილი იპოვონ.

თბილისის მერიისგან ზაზა სარალიძისთვის მსგავსი შინაარსის კომუნიკაციის გამო არასამთავრობო ორგანიზაციებმა 10 ნოემბრისთვის აქცია "კარვებით ვიცავთ თავისუფლებას!" დააანონსეს. დღევანდელ, 10 ნოემბრის აქციაზე პოლიციის თანამშრომლებმა კარვის გაშლის საშუალება არ მისცეს ზაზა სარალიძეს, თუმცა არასამთავრობო ორგანიზაციებმა პროტესტის ეს ფორმა მაინც გამოიყენეს.