ცენტრალური საარჩევნო კომისიამ აქტივობის სტატისტიკა გამოაქვეყნა. საპრეზიდენტო არჩევნებზე მთელი საქართველოს მასშტაბით აქტივობამ 46,74%-ს შეადგინა. 3 504 082 რეგისტრირებული ამომრჩევლიდან დღეს თავისი არჩევანი 1 637 956-მა დააფიქსირა. აქტივობა მნიშვნელოვნად განსხვავდებოდა საქართველოს სხვადასხვა ქალაქებში. ზოგიერთ ადგილას ამომრჩევლების რაოდენობა 40%-ზე დაბალი იყო, ზოგიერთებში კი 60%-ს აღემატებოდა.

ყველაზე აქტიური ქალაქები

  • ხონი - 60,5%;
  • ადიგენი - 60,53%;
  • ამბროლაური - 61,17%;
  • ასპინძა - 63,05%;
  • ქედა - 64,74%;

ყველაზე პასიური ქალაქები

  • მარნეული - 36,47%;
  • გარდაბანი - 37,31%;
  • ყაზბეგი - 37,33%;
  • წალკა - 38,94%;
  • საგარეჯო - 39,72%;

საქართველოში საპრეზიდენტო არჩევნების დასრულების შემდეგ გამოქვეყნებული სამი ეგზიტპოლის მიხედვით, სამი სხვადასხვა შედეგი დაიდო.

მმართველი პარტიის ეგზიტპოლით, 52.3 %-ით მათმა მხარდაჭერილმა კანდიდატმა, სალომე ზურაბიშვილმა გაიმარჯვა. მათი თქმით, 28.1 % აქვს გაერთიანებული ოპოზიციის კანდიდატს, გრიგოლ ვაშაძეს და 9.2% ევროპული საქართველოს კანდიდატს, დავით ბაქრაძეს. ფსიქოპროექტმა 100 უბანზე 5104 ადამიანი გამოკითხა. ცდომილების ფარგლები 2.6%-ია.

ევროპული საქართველოს ეგზიტპოლით მეორე ტური იმართება. კერძოდ, 37% აქვს გრიგოლ ვაშაძეს და 34% სალომე ზურაბიშვილს. პარტიის კანდიდატს, დავით ბაქრაძეს 17% აქვს, შალვა ნათელაშვილს კი — 4. კომპანია BCG-მ 105 საარჩევნო უბანზე 6 000 ადამიანი გამოკითხა. მაქსიმალური ცდომილება 3%-ია.

რუსთავი 2-ის მიერ ჩატარებული ეგზიტპოლის შუალედური შედეგებითაც სალომე ზურაბიშვილს და გრიგოლ ვაშაძეს 40-40% ქონდათ, დავით ბაქრაძეს კი — 10%.