საყოველთაოდ ცნობილი ფაქტია, რომ რაიან მერფი მაყურებელს საინტერესო სერიალებითა თუ სატელევიზიო ფილმებით ყოველთვის ანებივრებდა. ამერიკული საშინელებათა ისტორიის და დანაშაულებათა ამერიკული ისტორიის შემდეგ მერფი, 2017 წელს, მაყურებელს ახალ სერიალს წარუდგენს.

შუღლი ასე ერქმევა სატელევიზიო შოუს, რომელიც ჰოლივუდის ოქროს ხანის, ლეგენდარული მსახიობების ცხოვრებისა და შუღლის შესახებ მოგვითხრობს. ყურადღების ეპიცენტრში კი ბეტ დევისი და ჯოან კროუფორდის უერთიერთობა მოექცევა. რეჟისორი და სცენარისტი ჰორორის ჟანრის კლასიკად შერაცხული რა დაემართა ბეიბი ჯეინს? კულისებში შეგვახედებს და გვიჩვენებს თუ რეალურად რამდენად რთული იყო ერთ-ერთი ყველაზე წარმატებული ამერიკული ფილმის გადაღება მაშინ, როდესაც ორი ლეგენდარული მსახიობი ერთმანეთს, არამხოლოდ ფილმში, არამედ გადასაღებ მოედანზეც ექიშპებოდნენ.

როგორც მერფის შეეფერება, სამსახიობო შემადგენლობა ამ შემთხვევაშიც ვარსკვლავური იქნება და მთავარ როლებს - ჯესიკა ლანგი, სიუზან სარანდონი და კეტრინ ზეტა ჯონსი ითამაშებენ.

ჯესიკა ლანგი, რომელმაც ყველას გული დაგვწყვიტა და ამერიკული საშინელებათა ისტორია დატოვა, შუღლში ჯოან კროუფორდის როლს შეასრულებს.

ჯოან კროუფორდი ჰოლივუდის ოქროს ხანის ერთ-ერთი უდიდესი წარმომადგენელი იყო. თავის დროზე, ის ერთ-ერთ ყველაზე მაღალანაზღაურებად მსახიობ ქალად ითვლებოდა ამერიკულ კინოში და ყველა დროის ერთ-ერთ უდიდეს ქალი მსახიობადაა დასახელებული.

სიუზან სარანდონი შოუში ბეტ დევისის როლს მოირგებს.

ბეტი დეივისი ამერიკელი კინოს, ტელევიზიისა და თეატრის ყველაზე სახასიათო მსახიობად ითვლება. საყოველთაოდ აღიარებული ფაქტია, რომ მასზე უკეთ უარყოფითი როლების შესრულება არავის შეეძლო. თუმცა მისი ნიჭი მხოლოდ ერთი ხასიათებს როლებს არ მოიცავდა, ბეტი არანაკლებ კარგად ართმევდა თავს მელოდრამებში, ისტორიულ ფილმებსა და დრამებში თამაშს.

დევისის იყო პირველი ქალი, რომელიც ამერიკის კინო აკადემიის პრეზიდენტი გახდა, თუმცა მისი ბობოქარი ხასიათისა და დაუსრულებელი სკანდალების გამო მალევე დატოვა თანამდებობა.

სასიხარულოა ის ფაქტიც, რომ მერფის სერიალის საშუალებით ეკრანზე კეტრინ ზეტა-ჯონსი დაბრუნდება, რომელიც უკვე წლებია იმაზე იშვიათად ჩანს ეკრანზე, ვიდრე რომელიმე ჩვენგანი.

ჯონსი შუღლში ჰოლივუდის ოქროს ხანის უკანასკნელ ცოცხალ ლეგენდას ოლივია დე ჰავილანდს განასახიერებს, რომელსაც სულ ცოტა ხნის წინ 100 წელი შეუსრულდა.

ოლივიას სახელის გაგონებაზე, პირველი, რაც მაყურებელს ახსენდება, მელანი ჰამილტონის პერსონაჟია ფილმიდან ქარწაღებულნი. მიუხედავად იმისა, რომ ორი ოსკარის მფლობელი მსახიობი ფილმ რა დაემართა ბეიბი ჯეინს? გადაღებასთან საერთოდ არაფერ კავშირშია, არანაკლებ სკანდალური და შუღლით სავსე იყო მისი ცხოვრება. ის წლების განმავლობაში არ ელაპარაკებოდა საკუთარ დას, ერთ-ერთ ყველაზე ცნობილ და წარმატებულ ამერიკელ მსახიობს - ჯოან ფონტეინს.

ოლივია დე ჰავილანდი ბეტ დევისის უახლოესი მეგობარი იყო და სერიალშიც, სავარაუდოდ, სწორედ ამ ამპლუით იქნება წარმოდგენილი.

სერიალის პრემიერა FX-ზე 2017 წელს არის დაგეგმილი და მისი პროდიუსერი ბრედ პიტი იქნება.

მოემზადეთ, მაყურებელს, რომელსაც უყვარს ძველი ჰოლივუდი, განსაკუთრებით კი ბეტ დევისი და ჯოან კროუფორდი, საბოლოოდ გაიგებს რა ხდებოდა გადასაღებ მოედანზე მაშინ როდესაც ბეიბი ჯეინს რაღაც დაემართა.