პანკისის ხეობაში ეროვნული სატყეო სააგენტოს თანამშრომლებმა მამალი არჩვი მოკლეს. ამის შესახებ ინფორმაციას გარემოსდაცვითი ზედამხედველობის სამსახური ავრცელებს.

უწყების ცნობით, გადამოწმების მიზნით მათ ახმეტის პოლიციის თანამშრომლებთან ერთად მოქალაქეები გააჩერეს, რომლებსაც მოკლული არჩვის გარდა, რეგისტრირებული იარაღი, ჩეზეს მარკის 3 ცალი შაშხანა და სავარაუდოდ, საბრძოლო ვაზნები აღმოაჩნდათ.

გარემოსდაცვითი ზედამხედველობის სააგენტოს ცნობითვე, მათ პირადი განცხადებების საფუძველზე თანამდებობები დატოვეს. უწყებაში ამბობენ, რომ არჩვი საქართველოს წითელი ნუსხით დაცული სახეობაა და მისი მოკვლის შემთხვევაში, გარემოსთვის მიყენებული ზიანი 30 000 ლარია.

განცხადებაში ნათქვამია, რომ საქმის მასალები შემდგომი რეაგირების მიზნით შინაგან საქმეთა სამინისტროს გადაეგზავნება.