დღეს, 3 ოქტომბერს ჩრდილოატლანტიკური ალიანსის გენერალურმა მდივანმა იენს სტოლტენბერგმა, ნატო-საქართველოს კომისიის სხდომის შემდეგ გამართულ პრესკონფერენციაზე განაცხადა, რომ საქართველო ალიანსის უახლოეს პარტნიორებს შორისაა:

"ჩვენ ძალიან ვაფასებთ იმ კონტრიბუციას, რაც საქართველოს შეაქვს ჩვენს საერთო უსაფრთხოებაში. საქართველო უმსხვილესი კონტრიბუტორია ავღანეთის მისიაში".

სტოლტენბერგის თქმით, კომისიის სხდომაზე მხარეებმა განიხილეს, თუ როგორ განევითარებინათ თანამშრომლობა:

"ივლისის სამიტზე ალიანსის ლიდერებმა კიდევ ერთხელ დაადასტურეს, რომ საქართველო გახდება ნატოს წევრი ქვეყანა. ეს არის 2008 წლის ბუქარესტის სამიტის გადაწყვეტილების გაგრძელება. ნატოს კარი კვლავ ღია რჩება".

იენს სტოლტენბერგი მოუწოდებს რუსეთს შეწყვიტოს აფხაზეთისა და ცხინვალის რეგიონების დამოუკიდებლად აღიარება და გაიყვანოს სამხედრო ძალები საქართველოს რეგიონებიდან.

ალიანსის ლიდერი შეშფოთებას გამოთქვამს შავი ზღვის რეგიონში რუსეთის სამხედრო დანაყოფების გაძლიერების გამო:

"შავი ზღვის უსაფრთხოება პრიორიტეტულია, როგორც ნატოსთვის ისე, საქართველოსთვის. ჩვენ ვაგრძელებთ საქართველოს სანაპირო დაცვის წვრთნებს. ნატოს არსებითი პაკეტი აძლიერებს ქვეყნის თავდაცვით რეფორმებს. ჩვენ მოვუწოდებთ საქართველოს, გააგრძელოს ამ გზით სიარული და რეფორმების განხორციელება".

ბრიუსელში, ნატოს შტაბ-ბინაში, ალიანსის წევრი ქვეყნების თავდაცვის მინისტრების მონაწილეობით ნატო-საქართველოს კომისიის სხდომა გაიმართა. შეხვედრა ნატოს გენერალურმა მდივანმა იენს სტოლტენბერგმა გახსნა.