საქართველოს პრეზიდენტმა, გიორგი მარგველაშვილმა რამდენიმე წუთის წინ ქორწინების დეფინიციაზე რეფერენდუმის ჩატარებასთან დაკავშირებით განცხადება გააკეთა.

მარგველაშვილის თქმით, იმის გამო, რომ საქართველოს ტერიტორიების 20% ოკუპირებულია რეფერენდუმის ჩატარება რუსეთის დამატებით სამართლებლივ არგუმენტებს მისცემს:

"მაშინ როდესაც 2008 წლის აგვისტოდან რუსეთს საქართველოს ორი ოკუპირებული ტერიტორია აღიარებული აქვს დამოუკიდებელ სახელმწიფოებად, ამ რეალობაში რეფერენდუმის ჩატარება დამატებით სამართლებლივ არგუმენტებს აძლევს ოკუპანტს".

კონკრეტულ ინიციატივასთან დაკავშირებით მარგველაშვილმა თქვა, რომ რეფერენდუმის ჩატარების საფუძველი არ არსებობს:

"მასში წარმოდგენილი ფორმულირება არ ექვემდებარება რეფერენდუმს, ვინაიდან ეს საკითხი უკვე გადაწყვეტილია ქართულ კანონმდებლობაში და დადგენილია, რომ ქორწინება ოჯახის შექმნის მიზნით ქალისა და მამაკაცის ნებაყოფლობითი კავშირია".

პრეზიდენტის თქმით, თუ არსებობს სურვილი, რომ ამ საკითხთან დაკავშირებით მიღებული იქნას კონსტიტუციური ცვლილება, შესაბამისი კანონ-პროექტი უნდა განიხილოს საქართველოს პარლამენტმა.

„გინდათ თუ არა, რომ ერთნაირ სქესიანთა ქორწინება დაშვებულ იქნას საქართველოში?“ - ასეთი ფორმულირება ჰქონდა სარეფერენდუმო კითხვას, რომელიც საინიციატივო ჯგუფმა პრეზიდენტს განსახილველად წარუდგინა.