აშშ-ის ღია პირველობის პირველ ტურში ფრანგმა ჩოგბურთელმა და მსოფლიოს 31-ე ჩოგანმა ალიზე კორნემ მსაჯისგან მოულოდნელად შენიშვნა მიიღო, რადგან კორტზე მაისური გაიხადა.

ამის გამო მსაჯს ბევრი აკრიტიკებდა, მიუხედავად იმისა, რომ ის წესების ფარგლებში მოქმედებდა. ახლა კი ეს წესი აღარ არსებობს.

28 წლის ჩოგბურთელი ტურნირზე თავის პირველ მატჩს თამაშობდა, როდესაც მეორე და მესამე სეტებს შორის გასახდელში გავიდა, რათა გამოეცვალა. კორტზე დაბრუნებისას მან აღმოაჩინა, რომ მაისური უკუღმა ჩაიცვა, იქვე გაიხადა და გაისწორა. მაისურის ქვეშ კორნეს სპორტული ტოპი ეცვა. მსაჯმა კი მიუთითა, რომ კორტზე მაისურის გახდით მან ქალთა საჩოგბურთო ასოციაციის (WTA) წესი დაარღვია.

წესები მიხედვით, ამერიკის ღია პირველობაზე ქალები გამოსაცვლელად აუცილებლად გასახდელში უნდა გავიდნენ. ალიზე კორნემ კი მოთამაშის ქცევის კოდექსი დაარღვია. მსგავსი დარღვევა უცენზურო გამონათქვამებსა და მსგავს მიუღებელ ქცევებს უტოლდება.

ამერიკის ღია პირველობის მსვლელობისას კორტებზე საშინელი სიცხეა. ამის გამო ხუთმა ჩოგბურთელმა ტურნირიდან თავი უკვე მოიხსნა. მსაჯის გადაწყვეტილება ბევრმა დისკრიმინაციულად მიიჩნია, რადგან კაც ჩოგბურთელებს მსგავს შენიშვნას არ აძლევენ და მათ კორტზე მაისურის გამოცვლის საშუალება თავისუფლად ეძლევათ.

WTA-ის ხელმძღვანელობამ განაცხადა, რომ ალიზე კორნემ შენიშვნა უსამართლოდ მიიღო. ამ ფაქტის შემდეგ ჩოგბურთელ ქალებს გამოსაცვლელად გასახდელში გასვლა აღარ მოუწევთ.

"ეს არ იყო ქალთა საჩოგბურთო ასოციაციის წესებზე დაფუძნებული წესი არ იყო, რადგან ასოციაციას რეგულაციები არ აქვს. ეს ტურნირის წესია და მოხარულები ვართ, რომ შეერთებული შტატების ჩოგბურთელთა ასოციაციამ ის შეცვალა", - წერია განცხადებაში.

"ყველა ჩოგბურთელს შეუძლია, რომ მაისური მოთამაშეების სკამზე გამოიცვალოს. ეს არ არის კოდექსის დარღვევა", - წერია ამერიკის ღია პირველობის ტურნირის განცხადებაში.