Valar Morghulis ბრაავოსელნო, ანდალნო, პირველო ადამიანნო, ტყის შვილნო, დრაკონის სისხლთაგანნო და უბრალოდ ვესტეროსის სამყაროს ერთგულო ფანებო. ჭორი, რომელმაც მთელი ინტერნეტსივრცე მოიცვა და უამრავი მკითხველი დააიმედა, არ დასტურდება!

სოციალური ქსელები და უცხოური მედია ბოლო რამდენიმე დღეა აქტიურად ავრცელებენ ინფორმაციას ჯოჯრ მარტინის საგის - ყინულისა და ცეცხლის სიმღერის მეექვსე ნაწილის ზამთრის ქარების გამოსვლის თარიღის შესახებ. გარდა ამისა, ფანების დიდი ნაწილი, ელოდა, რომ კანზასის შტატში გამართულ მსოფლიო ფენტეზის კონვენციაზე, მარტინი მეშვიდე წიგნს - ზაფხულის ოცნებას წარადგენდა. გავრცელებული ინფორმაციით, წიგნების პრეზენტაცია აგვისტოში იყო დაგეგმილი, თუმცა ინფორმაცია არ დადასტურდა.

7 სამეფოს ბრძოლა და ინტრიგები ერთგული მკითხველისთვის ჯერ კიდევ მიუწვდომელი რჩება. ფენტეზის ჟანრში, ბოლო დროის ყველაზე გახმაურებულმა ნაწარმოებმა მილიონობით ფანი გააერთიანა და ეკრანიზაციას დიდი პოპულარობა მოუტანა. მიუხედავად ფანდომის დიდი რიცხვისა, მწერალი მკითხველს ტანჯავს და წიგნის ახალ ნაწილებს საკმაოდ დიდი, თითქმის ხუთწლიანი შუალედით სთავაზობს. წიგნის მეხუთე ნაწილი - დრაკონების ცეკვა 2011 წელს გამოვიდა, მარტინი კი არ ჩქარობს მეექვსე ნაწილის პრეზენტაცია 2016 წელს შედგეს.

დაილი ტელეგრაფთან ინტერვიუში წიგნის ოფიციალური გამომცემლის HarperCollins-ის მარკეტინგული კომუნიკაციების ხემძღვანელი, ჯაკი არტური აცხადებს :

"ჩვენ არ ვიცით, როდის შედგება პრეზენტაცია. ვიცით მხოლოდ ის, რომ მარტინი წიგნს წერს. როცა წიგნის პუბლიკაციის თარიღი გახდება ცნობილი ეს იქნება დიდი მოვლენა გამომცემლობისთვის".

ჯაკი არტურის თქმით, ამ წიგნის გამოცემა არ არის მარტივი მოვლენა, რომელიც ერთ ღამეში მოხდება. ეს არის ისტორია, რომელიც ყველა წიგნის დახლზე უნდა გამოჩნდეს, ამიტომ ეს იქნება საკმაოდ ხანგრძლივი ლოჯისტიკური პროცესი. მისი თქმით, ჰარი პოტერის ახალი ნაწილის გამოცემის შემდეგ ეს იქნება ყველაზე დიდი მოვლენა ფენტეზის სამყაროში.

ჯაკი არტურმა ისაუბრა სხვა ჭორზეც, რომელი წიგნის რაოდენობასთან დაკავშირებით გავრცელდა. HBO-მ დაადასტურა, რომ სერიალი რვა სეზონით დასრულდება. აქედან გამომდინარე ფანები დაინტერესდნენ დასრულდება თუ არა წიგნი მერვე ნაწილით.

"ყველა დამეთანხმება, რომ ჩვენ გვინდა იმდენი სატახტოთა თამაშები, რამდენიც მარტინს შეუძლია, რომ მოგვცეს. ასე რომ პასუხი კითხვაზე, იქნება თუ არა წიგნი რვა ნაწილიანი, მხოლოდ ერთია - შესაძლოა", - ამბობს ჯაკი არტური.

მაშ ასე, როგორც ჩანს მარტინი კიდევ დიდ ხანს არ გვამცნობს, ვინ არის რკინის ტახტის მომავალი მეფე ან დედოფალი, რა ბედი ეწევა ვესტეროსს, შეძლებენ თუ არა თეთრი მოსიარულეები ისტორიაში პირველად კედლის გადალახვას. თუმცა, ცნობილია ყველაზე მნიშვნელოვანი ფაქტი- ზამთარი მოვიდა და ჰეფი ენდს არ უნდა ველოდოთ ნუ დაგვავიწყდება All men must die და თანაც winter is not coming, winter is here!

Valar dohaeris !