ქვეყნები, სადაც ჰომოფობიური კანონები და გარემოა მილიარდობით დოლარის შემოსავლებს კარგავენ. კვლევა, რომელიც ამ ფაქტს ადასტურებს პიტერ ტაჩელის ფონდმა ჩაატარა. შედეგები რამდენიმე დღის წინ დიდი ბრიტანეთის თემთა პალატაში წარმადგინეს.

კვლევის თანახმად, შესაძლო შემოსავლები, რომლებიც ჰომოფობიურ გარემოს ეწირება ძირითადად საინვესტიციო და ტურიზმის სფეროს მოიცავს. დღევანდელი მდგომარეობით, მსოფლიოში ასეთი 71 სახელმწიფო არსებობს.

მონაცემების მიხედვით, ლგბტქ თემის წევრები წელიწადში დაახლოებით $211 მილიარდს მოგზაურობაზე ხარჯავენ. ამ ფულის უდიდესი ნაწილი სწორედ იმ ქვეყნებში შედის, სადაც უზრუნველყოფილია ადამიანის ძირითადი უფლებები.

როგორც აღმოჩნდა, ლგბტქ ადამიანებისთვის ყველაზე მიმზიდველი ქვეყნებია: ავსტრალია, კანადა, საფრანგეთი, დიდი ბრიტანეთი.

ამერიკაში მცხოვრები ლგბტქ წყვილებისთვის ყველაზე პოპულარულ სახელმწიფოებად ევროპის ის სახელმწიფოები მიიჩნევა, სადაც უზრუნველყოფილია თემის წევრების საბაზისო უფლებები. ნაკადი 2011 წლიდან დღემდე 276 პროცენტით არის გაზრდილი.

კვლევის მიხედვით, გამოიკვეთა სხვა პრობლემებიც, კერძოდ კი აღმოჩნდა, რომ ჰომოფობიური სამართლებრივი გარემოს გამო, ქვეყნები კარგავენ არამარტო შესაძლო შემოსავალს ტურიზმიდან არამედ ისინი განიცდიან ე.წ. ტვინების გადინების პროცესსაც.

საქმე იმაშია, რომ ლგბტქ ადამიანები, რომლებიც ვერ ახერხებენ განვითარებას და რეალიზაციას ჰომოფობიური დამოკიდებულების გამო გადიან საზღვარგარეთ და იქ ქმნიან სხვადასხვა სახის დოვლათს.

წინა წელს ჩატარებული კვლევის თანახმად, ლგბტქ ადამიანები აშშ-ში დაახლოებით $2 მილიარდის ღირებულების ბიზნესს ფლობენ და მართავენ. ლგბტქ ადამიანების წვლილი ამერიკის ეკონომიკაში საკმაოდ დიდია. ამავე კვლევის თანახმად, ბოლო წლის განმავლობაში ლგბტქ ადამიანებმა ამერიკაში 33 ათასი ახალი სამუშაო ადგილი შექმნეს.