მარნეულის მერს, თემურ აბაზოვს რუსთავის საქალაქო სასამართლომ აღკვეთი ღონისძიების სახით პატიმრობა შეუფარდა. სხდომა დღეს, 14 ივნისს გაიმართა.

ბრალდებულის ადვოკატი აბაზოვის გათავისუფლებას 10 ათას ლარიანი გირაოთი ითხოვდა, რაც მოსამართლემ არ დააკმაყოფილა. ბრალდებული მერის მტკიცებით, იგი ყოველთვის იცავდა კანონს და მომხდარს პროვოკაციას უწოდებს.

თემურ აბაზოვი მარნეულში მცხოვრებ ელჩინ ალახვერდიევის მიმართ განხორციელებული დამამცირებელი და არაადამიანური მოპყრობის ბრალდებით, გუშინ 13 ივნისს დააკავეს.

მარნეულში მომხდარი ძალადობის ფაქტზე, პროკურატურა აცხადებს, რომ პირს, რომელმაც აქციაზე მარნეულის მერსა და ბიძინა ივანიშვილს აგინა, თემურ აბაზოვმა სახეში შეაფურთხა, მიაყენა ფიზიკური შეურაცხყოფა, აიძულა მოეშარდა ჭიქაში და შარდით მოებანა სახე.

ამ ფაქტის ამსახველი ვიდეომასალა სტუდია მონიტორმა 12 ივნისს გაავრცელა.

გამოძიება სისხლის სამართლის კოდექსის 1443–ე მუხლის მე-2 ნაწილის "ა" და "ე" ქვეპუნქტებით მიმდინარეობს. მარნეულის მერს, თემურ აბაზოვს 5-დან 10 წლამდე პატიმრობა ემუქრება.