შინაგან საქმეთა სამინისტრომ რუსთავში ქურდობის მცდელობის ბრალდებით ორი არასრულწლოვანი დააკავა. უწყების ცნობით, ისინი პირობითი მსჯავრის ქვეშ იყვნენ.

გამოძიების ვერსიით, არასრულწლოვნებმა მიმდინარე წლის 5 მაისს, ღამით, რუსთავში, მე-14 მიკრორაიონში მდებარე სასურსათო მაღაზიის კარი დააზიანეს:

"როდესაც მაღაზიაში შეღწევას ცდილობდნენ, გამვლელმა შეამჩნია და პოლიციას აცნობა. არასრულწლოვნებმა შემთხვევის ადგილიდან მიმალვა მოახერხეს".

შსს-ს ცნობით, მოქალაქემ, რომელმაც მომხდარის შესახებ პოლიციას აცნობა, ითანამშრომლა გამოძიებასთან.

გამოძიება მიმდინარეობს წინასწარი შეთანხმებით ჯგუფის მიერ სადგომში ან სხვა საცავში უკანონო შეღწევით ქურდობის მცდელობის ფაქტზე.