ე.წ. გლდანის დეპოში მეტროს თანამშრომლების გაფიცვა არ სრულდება. მემანქანეები და მეტროს სხვა თანამშრომლები ხელფასების გაზრდის მოთხოვნით კვლავ არიან შეკრებილები, თუმცა, მათი თქმით, არც მერიის და არც კომპანიის წარმომადგენელი მივიდა მათთან.

მემანქანე, რომელიც რამდენიმე წუთის წინ გამოვიდა სიტყვით თქვა, რომ თბილისი მერი, კახა კალაძე თავისი გადაწყვეტილებით მონათმფლობელობას აკანონებს.

"ჩვენი მოთხოვნები ადვილი დასაკმაყოფილებელია. თბილისის მუნიციპალიტეტი ჩვენი მოთხოვნების დაკმაყოფილების სანაცვლოდ კომპანიას აკოტრებს - მეტრო გააჩერა, ზარალზე, პლუს ამას ავტობუსებს ამუშავებს უფასოდ. ბიუჯეტს [კახა კალაძე, თბილისის მერი] ხარჯავს იმისთვის, რომ ჩვენთან არ მოვიდეს, თავისი პრინციპი გაიტანოს და მუშა ხალხს არ დაელაპარაკოს, აჩვენოს საზოგადოებას რომ მე თქვენზე მაღლა ვდგავარო", - ამბობს მემანქანე.

მეტროს თანამშრომლები ხელფასის 45 პროცენტით გაზრდის მოთხოვნით 24 საათზე მეტია გაფიცულები არიან. ამ დრომდე უცნობია იმუშავებს თუ არა ხვალ, 5 ივნისს მეტრო. ამ გაფიცვის გამო თბილისში ტრანსპორტით გადაადგილება რთულია. თუმცა თბილისში საცობების პრობლემა ზოგადად არსებობს.

მეტროს მემანქანეები ამბობენ, რომ ხელფასი 2013 წლიდან არ გაზრდიათ, რასაც კომპანიაში არ ეთანხმებიან. კომპანიის იურისტმა On.ge-ს უთხრა, რომ ხელფასების ზრდა დანამატების სახით მოხდა.

ამავე თემაზე: