საქართველოს პრეზიდენტის მრჩეველი, ანა ნაცვლიშვილი მთავარი პროკურორის, ირაკლი შოთაძის ბრიფინგს არაადეკვატურს უწოდებს. მისი თქმით, ის პასუხგაუცემელი კითხვები, რაც თვეების განმავლობაში ჰქონდა დაზარალებულ ზაზა სარალიძეს უპასუხოდ რჩება.

"ჩვენ დიდი ხანია ვსაუბრობთ, რომ ამ სისტემაში ისევ ისე ადამიანები რჩებიან და იმავე მეთოდებით მუშაობენ", - ამბობს ანა ნაცვლიშვილი.

ირაკლი შოთაძემ, ბრიფინგზე განაცხადა, რომ ხორავას ქუჩაზე მომხდარ მკვლელობის საქმის გამოძიებაში, საერთაშორისო პროკურორები ჩაერთვებიან და ექსპერტიზა ჩატარდება შვეიცარიის საექსპერტო ბიუროში. გარდა ამისა, შოთაძე ამბობს, რომ ამ პროცესში ჩართვა, ზაზა სარალიძესაც შეეძლება.

პროკურორმა დღესვე აღნიშნა, რომ მათ ყველაფერი გააკეთეს, რაც შეეძლოთ და ხორავას ქუჩის საქმეში მონაწილე არასრულწლოვნებს სთხოვა გამოძიებასთან ითანამშრომლონ.

თბილისის საქალაქო სასამართლოს ინფორმაციით, ე.წ. ხორავას ქუჩის საქმეზე გამამტყუნებელი განაჩენი ორივე პირის მიმართ გამოიტანეს. კერძოდ, დამნაშავისათვის წინასწარი შეცნობით, არასრულწლოვნის განზრახ მკვლელობისათვის და მკვლელობის მცდელობისათვის სასამართლომ არასრულწლოვანი ბრალდებულები დამნაშავედ ცნო.