თეთრი ხმაურის მოძრაობა სოლიდარობას უცხადებს მეტროს თანამშრომლებს. განცხადებაში, რომელიც მათ ფეისუქ გვერდზე გავრცელდა, ნათქვამია, რომ კანონი და სასამართლო ამ ადამიანებს გაფიცვის უფლებას არ აძლევს, საკუთარი პროტესტის საჯარო სივრცეში დაყენებისთვის და განუსაზღვრელი ვადით ჩაგრულის პოზიციაში ტოვებს.

თეთრი ხმაურის მოძრაობას მიაჩნია, რომ მეტროს თანამშრომელთა გაფიცვა კანონიერია და არავის აქვს მათი პროტესტის შეზღუდვის უფლება:

"სახელმწიფოს მხრიდან გაფიცვის უფლების შეზღუდვა სახიფათოა და საგანგაშოა არა მხოლოდ მეტროს თანამშრომლებისთვის, არამედ, ყველასთვის ვინც მომავალში გაფიცვის საკითხის დღის წესრიგში დაყენებას გადაწყვეტს".

დღეს, 22 მაისს, 19 საათზე მეტროს თანამშრომლების სოლიდარობის აქცია გაიმართება.

მემანქანეების გაფიცვა

შპს თბილისის სატრანსპორტო კომპანიასთან კოლექტიური შრომითი დავა რამდენიმე თვეა მიმდინარეობს, რომლის ფარგლებში მიმდინარე მოლაპარაკებების წარუმატებლობის გამო, მეტროს თანამშრომლებმა კანონმდებლობით დადგენილი წესით 2018 წლის 3 მაისს გაფიცვა დააანონსეს, რომელიც თბილისის საქალაქო სასამართლოს მიერ 30 დღის ვადით 2018 წლის 3 ივნისამდე გადაიდო.

2018 წლის 21 მაისს თბილისის საქალაქო სასამართლომ, ამჯერად განუსაზღვრელი ვადით შეზღუდა პროფესიულ გაერთიანების წევრი მეტროს მემანქანეების გაფიცვაში მონაწილეობის მიღების უფლება "სამუშაო საათების განმავლობაში".