დიდი ბრიტანეთი და მთელი მსოფლიო 19 მაისის მოლოდინშია - ამ დღეს, უინძორის სასახლეში მეგან მარკლი და პრინცი ჰარი ქორწინდებიან. უამრავი კითხვა არსებობს: ვინ იქნებიან წყვილის მეჯვარეები? როგორი კაბა ეცმევა პატარძალს? ვინ იქნებიან სტუმრების სიაში და ვინ იმღერებს სფაის გერლზის გარდა?

უამრავი კითხვიდან ერთ-ერთის პასუხი სულ ცოტა ხნის წინ გახდა ცნობილი: პრინცმა მეჯვარეობა თავის უფროს ძმას, პრინც უილიამს სთხოვა.

"პრინცმა ჰარიმ კემბრიჯის ჰერცოგს, პრინც უილიამს სთხოვა, რომ ქორწილში მისი მეჯვარე ყოფილიყო. ჰერცოგი ამ თხოვნით ბედნიერია და ერთი სული აქვს, 19 მაისს წმინდა ჯორჯ ჩაპელის ტაძარში მის გვერდით იდგეს", - წერია განცხადებაში, რომელიც კენსინგტონის სასახლემ გაავრცელა.

აღსანიშნავია, რომ 2011 წელს გამართულ პრინცი უილიამისა და ქეით მიდლტონის ქორწილში, უილიამის მეჯვარეც პრინცი ჰარი იყო.

2018 წლის დასაწყისში, უილიამი ამბობდა, რომ ჰარის მისთვის მეჯვარის სტატუსი ჯერ არ ჰქონდა შეთავაზებული. მაშინ უილიამმა ძმებს შორის არსებულ მეგობრობაზეც ისაუბრა და თქვა, რომ ისინი განსაკუთრებით 1997 წელს დაახლოვდნენ, მაშინ, როცა პრინცესა დაიანა გარდაიცვალა.

"იმ სიტუაციამ, რომელშიც აღმოვჩნდით, ძალიან დაგვაახლოვა. დედის დაკარგვა ბავშვობაში ძალიან რთულია და ჩვენი მეგობრობა დაგვეხმარა, რომ ეს რთული ვითარება გადაგველახა. ერთნაირად ვფიქრობდით, ერთნაირი წინააღმდეგობები გვხვდებოდა წინ - ეს კი ძალიან კავშირის საფუძველი გახდა".

ჰარი უილიამის ქორწილში 2011 წლის 29 აპრილს

ფოტო: iPhoto

შემდეგი კითხვაა, ვინ იქნება მეგან მარკლის მეჯვარე. როგორც მისი საუკეთესო მეგობარი და ინდოელი მსახიობი პრიანკა ჩოპრა ამბობს, ეს საპატიო სტატუსი მას არ ერგება.