პროკურატურისა და შინაგან საქმეთა სამინისტროს თანამშრომლებმა, ქრთამის მიცემის ბრალდებით რუსთავში მცხოვრები ლ.ლ. დააკავეს.

გამოძიების ვერსიით, ბრალდებული გარდაბნის რაიონის ტერიტორიაზე გამავალი საირიგაციოდ განკუთვნილი დიდი ოდენობით ლითონის მილების ქურდობას გეგმავდა. უწყების ცნობით, მან მფარველობის სანაცვლოდ მოლაპარაკება სცადა შსს ქვემო ქართლის პოლიციის დეპარტამენტის გარდაბნის სამმართველოს გაჩიანის განყოფილების უფროსთან და ქრთამის სახით შესთავაზა 20 ათასი ლარი. ბრალდებული გუშინ, 17 აპრილს დააკავეს.

გამოძიება მიმდინარეობს საქართველოს სისხლის სამართლის კოდექსის 339-ე მუხლის მეორე ნაწილით, რაც სასჯელის სახედ და ზომად 4-დან 7 წლამდე თავისუფლების აღკვეთას ითვალისწინებს.