კომპანია სითი პარკმა თბილისის მერიასთან მოვალეობების გადაბარების პროცესი დაიწყო. დღეს, 16 მარტს თბილისის ვიცე-მერი ირაკლი ხმალაძე კომპანია სითი პარკის წარმომადგენლებს შეხვდა.

მერიის ცნობით, შეხვედრაზე მხარეები შეთანხმდნენ, რომ 10 აპრილის შემდეგ კი, პარკირების მენეჯმენტს თბილისის სატრანსპორტო კომპანია უზრუნველყოფს.

თბილისის ვიცე-მერის ირაკლი ხმალაძის თქმით, კომპანია კონსტრუქციული თანამშრომლობისთვის არის განწყობილი.

სითი პარკის წარმომადგენლებმა შეხვედრაზე აღნიშნეს, რომ გადაბარების პროცესს მაქსიმალურად უზრუნველყოფენ, რათა ქალაქში პარკირების მენეჯმენტი უწყვეტ რეჟიმში განხორციელდეს.

კომპანიის იურისტმა On.ge-სთან საუბარში განმარტა, რომ გადაბარების მიზანია, მოქალაქეების ინტერესებზე არ აისახოს თბილისის მერიის გადაწყვეტილება:

"გადაბარების პროცედურების დროს გათვალისწინებულ ვალდებულებებს სითი პარკი სრულად შეასრულებს".

მისივე თქმით, სამართლებრივი დავა გადაბარების პროსესისგან დამოუკიდებელია და ისინი კვლავ აპირებენ თავიანთი ინტერესების დაცვას. იურისტის განცხადებით, სითი პარკი ყველა მექანიზმს გამოიყენებს, ადგილობრივ თუ საერთაშორისო დონეზე.