"თუკი ყველას ამოცანა არის უფრო მეტად დაცული საქართველო, ჩვენ ვარშავიდან მივდივართ უფრო მეტად დაცული საქართველოთი", - ეს განცხადება თავდაცვის მინისტრმა, თინა ხიდაშელმა ვარშავის სამიტის ფარგლებში გამართული ორმხრივი შეხვედრების დასრულების შემდეგ გააკეთა:

"მქონდა შესაძლებლობა, მესაუბრა ესტონეთის პრემიერ-მინისტრთან, ლატვიის პრეზიდენტთან, ორივე ქვეყნის თავდაცვის მინისტრთან, ვისაუბრეთ ლიტველებთან, ჩვენს ჩრდილოელ პარტნიორებთან სკანდინავიის ქვეყნებიდან, რომლებსაც აქვთ მთავარი ლიდერის როლი აღებული ძალიან ბევრი მიმართულებით ყველა ახალ პროექტსა და ახალ ინიციატივაზე, რომელიც ვარშავაში გაცხადდა. ისინი მზად არიან, რომ თავიდან ბოლომდე, მთლიანად დაუდგნენ ჩვენს ქვეყანას გვერდით".

თავდაცვის სამინისტროს ცნობით, ნიდერლანდების თავდაცვის მინისტრთან ორ ქვეყანას შორის თავდაცვის სფეროში თანამშრომლობის საკითხებზე ისაუბრეს. თავდაცვის მინისტრმა კოლეგას სთხოვა, რომ ჰოლანდიამ აქტიური მონაწილეობა მიიღოს თავდაცვის ინსტიტუციური აღმშენებლობის სკოლის ნდობის ფონდში, რომლის განვითარებაშიც საკუთარი წვლილის შესატანად მზადყოფნა კიდევ ერთხელ გამოხატა იტალიამაც.

უწყების ინფორმაციით, გარდა ამისა, დღეს ცნობილი გახდა, რომ ნორვეგია სრულად იღებს პასუხისმგებლობას იმ ნდობის ფონდზე, რომელიც JTEC-ის გასაძლიერებლად შეიქმნა.

ამასთან, ხიდაშელმა შეხვედრა გამართა დანიის წარმომადგენლებთან, რომელსაც მნიშვნელოვანი წვლილი შეაქვს ნატო-საქართველოს ერთობლივ პროექტებში, განსაკუთრებით კი წვრთნისა და შეფასების ერთობლივი ცენტრის განვითარებაში.

რუმინეთის თავდაცვის მინისტრთან შეხვედრაზე კი ხიდაშელმა შავი ზღვის უსაფრთხოების საკითხი განიხილა. ხიდაშელის თქმით, რუმინულმა მხარემ თავდაცვის მინისტრს დაუდასტურა, რომ საქართველოს სტრატეგიულ დიალოგში ერთ-ერთი წამყვანი როლი ექნება:

"ძალიან ბევრი ახალი მიმართულებაა, რომელზეც რუმინელებთან გვქონდა შესაძლებლობა გვესაუბრა, განსაკუთრებით შავი ზღვის ფარგლებში, ვინაიდან, რუმინეთს წამყვანი როლი აკისრია. როგორც მათი უშიშროების საბჭოს მდივანი, ასევე თავდაცვის მინისტრი, საგარეო საქმეთა მინისტრი - ყველა ერთად აცხადებს, რომ სტრატეგიულ დიალოგში, რომელიც შავ ზღვაზე უკვე სამიტის დასრულებისთანავე დაიწყება, საქართველოს, ბუნებრივია, ექნება ერთ-ერთი წამყვანი როლი. ჩვენ ქაღალდზე უკვე დაგვიწერეს და დაგვიდასტურეს, რომ საქართველო მიწვეულია ამ სტრატეგიულ დიალოგში".