ნარკოპოლიტიკის რეფორმის განხილვა პარლამენტში ისევ გადაიდო, ამჯერად ორი თვით. გადაწყვეტილება დეპუტატებმა ბიუროს სხდომაზე მიიღეს.

კანონპროექტის საკომიტეტო განხილვის გადავადების ინიციატივა საპარლამენტო უმრავლესობის ლიდერს, არჩილ თალაკვაძეს ეკუთვნის. მისი თქმით, პარლამენტი, მთავრობა და სამოქალაქო სექტორი მთავარ მიზნებზე შეთანხმებულია.

"არაერთი ტექნიკური საკითხია, რაზეც ჯერჯერობით შეთანხმება არ არის სრულად მიღწეული. საბოლოოდ შევაჯერებთ თემებს. ასევე, განვიხილავთ საბიუჯეტო მაჩვენებელსაც, თუ რა რესურსი დასჭირდება პრევენციისა და სერვისების გაფართოებას", - განაცხადა არჩილ თალაკვაძემ.

თეთრი ხმაურის მოძრაობის, აქტივისტი ბექა წიქარიშვილი ვარაუდობს, რომ ნარკოპოლიტიკის რეფორმა პარლამენტში ჩავარდება. მისი თქმით, თეთრი ხმაურის მოძრაობისთვის პროცესი ჩაიკეტა და რეალურ ინფორმაციას ვეღარ იღებენ.

"ერთ-ერთი მთავარი აქტორისთვის, ვინც ეს საკითხი წამოწია, ლიდერობა აიღო, პროექტის ინიცირება მოახდინა, პროცესი ჩაკეტილია და ჩვენ სურათი, თუ რა ხდება შიგნით არ გვაქვს. რეფორმას ამ ხელისუფლების პირობებში შანსი არ აქვს", - განაცხადა ბექა წიქარიშვილმა.

თეთრი ხმაურის მოძრაობის აქტივისტი სამომავლო გეგმებზე არ საუბრობს, თუმცა აღნიშნავს, რომ გუნდში მუშაობა დაწყებულია და ოფიციალურ განცხადებას გაავრცელებენ.

ნარკოპოლიტიკის ეროვნული პლატფორმის ავტორობით მომზადებული კანონპროექტი პარლამენტში ივნისში დარეგისტრირდა.

გაიგეთ მეტი: დეკრიმინალიზაციის მოლოდინში