საქართველოს პროკურატურამ 2001 წლის 26 ივლისს მოკლული ჟურნალისტის, გიორგი სანაიას საქმეზე გამოძიება, განზრახ მკვლელობის მუხლით, ხელახლა დაიწყო. უწყებაში აღნიშნავენ, გამოვლინდა ახალი გარემოებები.

პროკურატურა განმარტავს, რომ შეისწავლეს პირველადი ინფორმაცია, გაესაუბრნენ მსჯავრდებულ კოტე ციხისთავს და მოკლული ჟურნალისტის ოჯახის წევრებს და საქმის ხელახლა გამოძიება გადაწყვიტეს.

პროკურატურაში აცხადებენ რომ საქმეზე ყველა საჭირო საგამოძიებო და საპროცესო მოქმედება ჩატარდება, ხოლო მიღებული შედეგების შესახებ დამატებით ეცნობება საზოგადოებას.

ჟურნალისტ გიორგი სანაიას მკვლელობის ფაქტზე, 2001 წლის 5 დეკემბერს სისხლის სამართლის პასუხისგებაში მიეცა გრიგოლ ხურცილავა, რომელიც თბილისის საქალაქო სასამართლოს 2003 წლის 9 ივლისის განაჩენით დამნაშავედ სცნეს და საბოლოოდ სასჯელის სახედ და ზომად განესაზღვრა თავისუფლების აღკვეთა 13 წლის ვადით. აღნიშნული განაჩენი, განზრახ მკვლელობის ნაწილში უცვლელად დატოვეს თბილისის სააპელაციო და საკასაციო ინსტანციის სასამართლოების მიერ. 2013 წელს გიორგი სანაიას მკვლელობაში ბრალდებულს ამნისტია შეეხო და გრიგოლ ხურცილავა ახლა თავისუფალია.

გიორგი სანაიას ოჯახმა პროკურატურას, რუსთავი 2-ზე გასული სიუჟეტის შემდეგ მიმართა. ჟურნალისტებთან საუბრისას, გიორგი სანაიას ძმამ, ვახო სანაიამ განაცხადა, რომ უნდა დაიკითხოს ყველა ის პირი, ვინც კოტე ციხისთავის განცხადებაში ფიგურირებს.

რუსთავი 2-თან საუბრისას, კოტე ციხისთავი ამტკიცებს, რომ პოლიტიკური მკვლელობა მთავრობაში დაიგეგმა და ის საქართველოს ნომერ პირველ ტერორისტად აღიარებულმა კრიმინალმა შეასრულა. ციხისთავის მტკიცებით, გიორგი სანაია შოთა ჭიჭიაშვილმა მოკლა.