მიუხედავად იმისა, რომ კატალონიის საპარლამენტო არჩევნებში ყველაზე მეტი ხმა ერთიანობის მომხრე პარტიამ, მოქალაქეები, მიიღო, კატალონიის პარლამენტში ადგილების უმრავლესობას სეპარატისტულად განწყობილი პარტიები მიიღებენ. 21 დეკემბრის არჩევნებში მონაწილეობა მიიღეს როგორც სეპარატისტულად განწყობილმა პარტიებმა, ასევე, პოლიტიკურმა ძალებმა, რომლებიც კატალონიისთვის ფართო ავტონომიას ემხრობიან და არ სურთ ესპანეთისგან მისი გამოყოფა.

ამ დროისთვის დათვლილია ხმათა 99 პროცენტი. ბოლო მონაცემებით, უმრავლესობას, 70 სადეპუტატო მანდატს, კატალონიის დამოუკიდებლობის მომხრე პარტიები მიიღებენ. სულ, კატალონიის პარლამენტში 135 სადეპუტატო ადგილია.

კატალონიის დამოუკიდებლობის მომხრე პარტიები, გაერთიანების შემთხვევაში, უმრავლესობის ფორმირებას შეძლებენ თუმცა, ესპანეთის ერთიანობის მომხრე პარტიამ, მოქალაქეები, როგორც ცალკე აღებულმა პარტიამ, ყველაზე მეტი, ხმათა 25 პროცენტი მიიღო და შესაბამისად, 36 სადეპუტატო მანდატი მოიპოვა. კატალონიის კანონმდებლობით, სწორედ პირველ ადგილზე გასული პარტია შეეცდება მთავრობის ფორმირებას თუმცა, შექმნილი ვითარებიდან გამომდინარე, მთავრობის ფორმირების პროცესი, სავარაუდოდ, რთული და დროში გაწელილი პროცესი იქნება.

თანამდებობიდან გათავისუფლებული კატალონიის ყოფილი ლიდერი კარლეს პუჩდემონი გამოეხმაურა ჩატარებულ არჩევნებს და განაცხადა, რომ "ეს დამოუკიდებლობის მომხრეთა უპირობო გამარჯვებაა, რომელშიც ეჭვს ვერავინ შეიტანს. კატალონიებმა მოიპოვეს უფლება, იყვნენ დამოიკიდებლები"

ევროპარლამენტში გამოსვლისას პუჩდემონმა განაცხადა, რომ ამ არჩევნებში გაიმარჯვა კატალონიის რესპუბლიკამ ხოლო, ესპანეთის სახელმწიფო კი დამარცხდა.

თავის მხრივ, ევროპარლამენტის წარმომადგენლებმა აღნიშნეს, რომ არჩევნები და მისი შედეგები ვერ შეცვლის ევროკავშირს ქვეყნების ოფიციალურ პოზიციას საკითხთან დაკავშირებით.

"კატალონიის საკითხთან დაკავშირებით ჩვენი პოზიცია საჯაროდ ცნობილია და არერთხელ გაჟღერდა ყველა დონეზე. ჩვენი პოზიცია არ შეიცვლება", - თქვა ევროკომიის პრეს-სპიკერმა ალექსანდრ ვინტერშტენმა.

აქტივობამ კატალონიის საპარლამენტო არჩევნებზე რეკორდულ - 80-პროცენტიან ნიშნულს მიაღწია. პირველ ადგილზე გავიდა პროესპანეური პარტია მოქალაქეები, ხოლო მეორეზე კატალონიელი მემარცხენეები, პუჩდემონის პარტია ამ წუთის მონაცემებით მესამე ადგილზე გავიდა.

მიუხედავად იმისა, რომ ყველაზე მეტი ხმა და შესაბამისად, მთავრობის ფორმირების უფლება ესპანეთის ერთიანობის მომხრე პარტიამ მიიღო, სეპარატისტული პარტიების გაერთიანების შემთხვევაში, ისინი ამ უპირატესობას დაკარგავენ.

არჩევნებს წინ მძიმე პოლიტიკური კრიზისი უძღოდა, მას შემდეგ რაც, 27 ოქტომბერს კატალონიის პარლამენტმა დამოუკიდებლობა გამოაცხადა, ესპანეთის ხელისუფლებამ კატალონიის ავტონომია გააუქმა და რეგიონში პირდაპირი მმართველობის წესი შემოიღო. უფრო მეტი კატალონიის კრიზისზე გაიგეთ აქ.