7 მარტს რუსეთის ყველაზე ცნობილმა სპორტსმენმა, ჩოგბურთელმა მარია შარაპოვამ აღიარა, რომ დოპინგ ტესტი ვერ გაიარა.

მისი თქმით, ის 2006 წლიდან იღებდა მელდონიუმს, თუმცა მსოფლიო ანტი-დოპინგ სააგენტომ დისკვალიფიკაცია ამაწლის იანვარში მისცა.

მელდონიუმი იშეემის საწინააღმდეგო მედიკამენტია, რომელიც გარდა დანიშნულებისამებრ მოქმედებისა, ხშირად პაციენტის გამძლეობას ამაღლებს. ამ გვერდითი მოვლენის გამო წამალს აქტიურად მოიხმარდნენ სპორტსმენები. 2016 წლის პირველი იანვრიდან მსოფლიო ანტი-დოპინგ სააგენტომ მელდონიუმი აკრძალულ პრეპარატთა სიაში შეიტანა.

"მე წლების განმავლობაში ვიღებდი მილდორნატს, ჩემი ოჯახის ექიმის დანიშნულებით, რამდენიმე დღის წინ ჩოგბურთის საერთაშორისო ფედერაციიდან მივიღე წერილი, რომლითაც მაცნობეს, რომ მილდორნატი იგივე მელდონიუმია." განაცხადა შარაპოვამ პრესკონფერენციაზე.

რუსეთის ფედერაციას რიოს ოლიმპიადაზე შარაპოვას იმედი ჰქონდა, რადგან 2012 წლის ლონდონის ოლიმპიადაზე აღებული ვერცხლის მედლის შემდეგ, შარაპოვას ოქროს უწინასწარმეტყველებდნენ. ჩოგბურთელის დისკვალიფიკაცია რუსეთის გუნდისთვის უდიდესი დარტყმაა, მითუმეტეს მაშინ, როცა მსოფლიო ანტი-დოპინგ სააგენტო რუსეთის დოპინგ-კონტროლის სამსახურს რუსი სპორტსმენების მიერ არალეგალური წამლების მასობრივად გამოყენების დაფარვაში ადანაშაულებს.

დოპინგ სკანდალი გერმანული არხი ARD-ის ერთ-ერთმა ჟურნალისტმა გახეთქა. მისი სიუჟეტის თანახმად, ყოველი მეხუთე რუსი სპორტსმენი შეჯიბრებებზე წარმატების მისაღწევად რაღაც სახის ნარკოტიკს იყენებს.