ვენაში ნაცნობი ბზუილი გაისმა — ევროვიზიის სცენას ლეგენდარული ტრიო დაუბრუნდა. ჯგუფმა ბზიკებმა, რომელიც წელს მსოფლიოს ყველაზე მასშტაბურ მუსიკალურ ფესტივალზე წარადგენს საქართველოს, ცოტა ხნის წინ პირველი ოფიციალური რეპეტიცია გაიარა. ქართველი კონკურსანტების პერფორმანსს დიდი გამოხმაურება ჯერ კიდევ იქამდე მოჰყვა, სანამ რეპეტიციის ფოტოები გავრცელდებოდა.

ბზიკების ყვითელი სასცენო კოსტიუმები შავი ზოლებითაა გაფორმებული, რაც ერთგვარი მინიშნებაა 18 წლის წინანდელ ტრიუმფზე — როცა ჯგუფმა საქართველოს საბავშვო ევროვიზიაზე პირველი გამარჯვება მოუტანა. მას შემდეგ ბზიკების მაღალი მოდა კიდევ უფრო დაიხვეწაო, წერენ ორგანიზატორები: "2026 წელს კი ისე გამოიყურებიან, თითქოს მომავლიდან გვესტუმრნენ. მათი სამოსი სუპერგმირების კოსტიუმებს მოგაგონებთ, რაც სიმბოლურია, რადგან ბზიკები საბავშვო და დიდების ევროვიზიის მულტივერსს აკავშირებენ".

ფოტო: EBU

რაც შეეხება უშუალოდ პერფორმანსს, რეპეტიციის ფოტოებში ჩანს, რომ ეკრანზე ჯგუფის წევრების კიბორგული "კლონებია" გამოსახული, სცენაზე კი ლაზერული შოუა მოწყობილი. ასეთი წარდგენა თემატურია, რადგან გიგა კუხიანიძის საკონკურსო სიმღერა, On Replay, "ხელოვნურ ინტელექტსა და თანამედროვე ეპოქაში ადამიანის როლს" შეეხება.

ფოტო: EBU

მეორე ოფიციალურ რეპეტიციას ბზიკები ოთხშაბათს, 6 მაისს, გაივლიან. ამის შემდეგ პერფორმანსის მოკლე ვიდეოჩანაწერიც გავრცელდება.

მილიონობით მაყურებლის წინაშე კი საქართველო 12 მაისს, პირველ ნახევარფინალურ ტურში წარდგება. ბზიკები სცენაზე მე-6 ნომრად იმღერებენ. თუკი ჯგუფი ტელემაყურებლისა და ჟიურის ჯამური ქულებით საუკეთესო ათეულში მოხვდება, საქართველო ფინალის საგზურს გაინაღდებს და 16 მაისს უკვე გამარჯვებისთვის იბრძოლებს.

ჯგუფმა ბზიკებმა — მარიამ კიკუაშვილმა, გიორგი შიოლაშვილმა და მარიამ თათულაშვილმა — საქართველოს ევროვიზია ჯუნიორზე პირველი გამარჯვება მოუტანა 2008 წელს. ამ ტრიუმფიდან 17 წლის შემდეგ, შარშან დეკემბერში, როცა საბავშვო ევროვიზიას საქართველო უკვე მეორედ მასპინძლობდა, ბზიკები კონკურსზე ისევ გამოჩნდნენ და ახალი სიმღერა We Don't Sleep შეასრულეს, რომელსაც ინტერნეტსივრცეში დიდი გამოხმაურება მოჰყვა: თვითონ სიმღერა ტიკტოკის ტრენდად იქცა, კონკურსის ფანების საკმაო ნაწილი კი გამოთქვამდა სურვილს, ჯგუფი "დიდების" ევროვიზიაზეც ეხილა.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...