იმ ფონზე, როდესაც ხელოვნური ინტელექტის მიერ შექმნილი არტისტები და სიმღერები მუსიკალურ პლატფორმებს ტბორავს, Spotify ახალ ნიშანს, "Verified by Spotify"-ს (Spotify-ს მიერ ვერიფიცირებული) ნერგავს. ეს მსმენელებს ნამდვილი, ადამიანი არტისტების იდენტიფიცირებაში დაეხმარება.

ნიშნის მისაღებად არტისტი გარკვეულ კრიტერიუმებს უნდა აკმაყოფილებდეს. Spotify ყურადღებას აქცევს არტისტის რეალურ აქტივობას როგორც პლატფორმაზე, ისე მის გარეთ, მაგალითად, კონცერტების თარიღებს, ატრიბუტიკას და პროფილზე მითითებულ სოციალური ქსელების ბმულებს. პროფილები, რომლებიც ძირითადად AI-გენერირებულ მუსიკას ან AI-პერსონაჟებს წარმოადგენენ, ვერიფიკაციას ვერ გაივლიან.

გარდა ამისა, არტისტებს დროის განმავლობაში უნდა ჰქონდეთ მსმენელთა სტაბილური აქტივობა და ჩართულობა. Spotify ფოკუსირებულია იმ პროფილებზე, რომლებსაც ადამიანები მიზანმიმართულად და ხანგრძლივად ეძებენ და არა მათზე, ვისაც ჩართულობის ერთჯერადი ნახტომი აქვს. გაშვების მომენტში, იმ არტისტების 99%-ზე მეტი, რომლებსაც მომხმარებლები აქტიურად ეძებენ, უკვე ვერიფიცირებული იქნება. Spotify-ს განცხადებით, მათი უმეტესობა დამოუკიდებელი შემსრულებელია, რომლებიც სხვადასხვა ჟანრს, კარიერულ ეტაპსა და რეგიონს წარმოადგენენ.

მომხმარებლები ახალ ნიშნებს არტისტების პროფილებსა და ძიების შედეგებში მომავალი კვირების განმავლობაში დაინახავენ. ნიშანი იქნება მწვანე სიმბოლო წარწერით "Verified by Spotify". პლატფორმაზე არსებული პროფილების დიდი რაოდენობის გამო, ვერიფიკაციის პროცესი ეტაპობრივად გაგრძელდება. ნიშნის არქონა არ ნიშნავს, რომ პროფილი მას მომავალში ვერ მიიღებს.

Spotify პრიორიტეტს ანიჭებს არტისტებს, რომლებსაც ჰყავთ აქტიური ფანები და მნიშვნელოვანი წვლილი შეაქვთ მუსიკალურ კულტურაში. პლატფორმა ნაკლებ ყურადღებას აქცევს ე.წ. "ფუნქციური მუსიკის" შემქმნელებს (მაგალითად, ალგორითმზე ოპტიმიზებული ფონური მუსიკა სამუშაოდ ან დასასვენებლად), რომელთა კონტენტიც პასიური მსმენელისთვისაა განკუთვნილი.

"ჩვენ ეს პროგრამა მსმენელებისა და არტისტების ინტერესების გათვალისწინებით შევქმენით და დროთა განმავლობაში მის განვითარებას გავაგრძელებთ", — ნათქვამია Spotify-ს ბლოგპოსტში — "ჩვენი მიზანია, გაგიმარტივოთ იმ ადამიანური შემოქმედების ნდობა, რომელსაც უსმენთ და დაგეხმაროთ საყვარელ არტისტებთან გრძელვადიანი კავშირის დამყარებაში".

პლატფორმა ასევე უშვებს პროფილის ახალ სექციას (ბეტა რეჟიმში), სადაც ნაჩვენები იქნება კარიერული მიღწევები, რელიზების ისტორია და ტურნეების განრიგი. ეს მომხმარებელს საშუალებას მისცემს, სწრაფად დაინახოს არტისტის ავთენტური აქტივობა მაშინაც კი, თუ მას ჯერ არ აქვს ვერიფიკაციის ნიშანი.

ეს განახლებები Spotify-ს მცდელობაა, ებრძოლოს პლატფორმაზე დაბალი ხარისხის AI-კონტენტის (ე.წ. AI Slop) და თვითმარქვია შემსრულებლების ზრდას. ეს ნაბიჯი მას შემდეგ გადაიდგა, რაც Sony Music-მა 135,000-ზე მეტი AI-გენერირებული სიმღერის წაშლა მოითხოვა, რომლებიც მათი არტისტების ხმებსა და სტილს უკანონოდ იყენებდნენ.

მიუხედავად იმისა, რომ Spotify-ს კონკრეტული ციფრები არ დაუსახელებია, კონკურენტმა Deezer-მა თქვა, რომ მათ პლატფორმაზე ყოველდღიურად ატვირთული ახალი მუსიკის 44%-ს უკვე ხელოვნური ინტელექტი წარმოადგენს.