რუსეთი პატივს სცემს უნგრეთის არჩევანს და ელის, რომ უნგრეთის ახალ ხელმძღვანელობასთან მოსკოვსა და ბუდაპეშტს შორის პრაგმატული კონტაქტები გაგრძელდება, — ამის შესახებ რუსეთის პრეზიდენტის პრესმდივანმა დიმიტრი პესკოვმა განაცხადა.

"უნგრეთმა თავისი არჩევანი გააკეთა და ჩვენც პატივს ვცემთ ამ არჩევანს. ველით, რომ გავაგრძელებთ ძალიან პრაგმატულ კონტაქტებს უნგრეთის ახალ ხელმძღვანელობასთან. ჩვენ მოვისმინეთ განცხადებები დიალოგში ჩართვის სურვილის შესახებ, რაც, რა თქმა უნდა, სასარგებლო იქნება როგორც მოსკოვისთვის, ასევე ბუდაპეშტისთვის", — განაცხადა პესკოვმა.

როგორც რუსული მედია წერს, მან უნგრეთის ახალი ხელმძღვანელობის სამომავლო ნაბიჯების მონიტორინგიც შესთავაზა.

"რაც შეეხება უნგრეთის ახალი ხელმძღვანელობის ქმედებებს, ალბათ, მოგვიწევს მოთმინება და ვნახოთ, რა მოხდება. ჩვენ, ვიმეორებ, დაინტერესებულნი ვართ უნგრეთთან, ისევე როგორც ყველა ევროპულ ქვეყანასთან, კარგი ურთიერთობების დამყარებით. ჩვენ ვიცით, რომ, სამწუხაროდ, ევროპის ქვეყნებთან ორმხრივი ურთიერთობა ჯერ კიდევ შეუძლებელია, მაგრამ რუსეთი ღიაა დიალოგისთვის", — თქვა მან.

რაც შეეხება "დრუჟბას" მილსადენის აღდგენის შესაძლებლობას, მისი თქმით, უნგრეთთან და ევროპელებთან კონსულტაციებია საჭირო, მაგრამ რუსეთი იყო და რჩება საიმედო ენერგომომწოდებელი.

"ამის შესახებ უნგრეთს და ევროპაში სხვა ვინმეს უნდა ჰკითხოთ. რუსეთი არის და დარჩება მსოფლიოში ერთ-ერთი ყველაზე საიმედო ენერგომომწოდებელი. ამ მხრივ, რუსეთის როლის გადაჭარბება შეუძლებელია", — განაცხადა პესკოვმა.