პოპვარსკვლავ ტეილორ სვიფტს მისი ახალი ალბომის სახელის გამო სასამართლოში უჩივიან, სარჩელი ლას-ვეგასის ყოფილმა შოუ-გოგომ შეიტანა, რომელიც ამტკიცებს, რომ სვიფტმა მისი მრავალწლიანი ბრენდი და სავაჭრო ნიშანი დაარღვია.

საქმე ეხება 2025 წელს გამოსულ ალბომს The Life of a Showgirl (შოუ-გოგოს ცხოვრება), რომლითაც, მარენ უეიდის მტკიცებით, სვიფტმა მისი უკვე არსებული ბრენდი და სავაჭრო ნიშანი დაარღვია.

სარჩელი კალიფორნიის ფედერალურ სასამართლოში ორშაბათს შევიდა. უეიდი ფლობს სახელწოდების Confessions of a Showgirl (შოუ-გოგოს აღსარებები) სავაჭრო ნიშანს და აცხადებს, რომ სვიფტის ალბომის სახელმა მომხმარებელთა დაბნეულობა გამოიწვია და მის მრავალწლიან საქმიანობას ზიანი მიაყენა.

ის სასამართლოს სთხოვს, სვიფტს აეკრძალოს "Showgirl"-ის ბრენდის გამოყენება და ასევე მოითხოვს დაუზუსტებელი ოდენობის ფინანსურ კომპენსაციას. სარჩელში მოპასუხედ დასახელებულია სვიფტის ლეიბლიც, Universal Music Group.

უეიდის ადვოკატი ჯეიმი პარკინენი ამბობს, რომ "შემსრულებელი, რომელმაც ბრენდის შექმნას 12 წელი მოანდომა, არ უნდა იყოს იძულებული უყუროს, როგორ ქრება ის მხოლოდ იმიტომ, რომ უფრო დიდი ფიგურა გამოჩნდა".

მარენ უეიდმა Confessions of a Showgirl-ის სვეტის წერა 2014 წელს დაიწყო Las Vegas Weekly-ში, მოგვიანებით კი ამავე სახელწოდებით პოდკასტიც და ცოცხალი მუსიკალური შოუც შექმნა. მისი პროექტი მოიცავს შოუ-გოგოს კარიერასთან დაკავშირებულ პირად, ხშირად იუმორისტულ ისტორიებს, დაწყებული აბსურდული სცენური სიტუაციებით და დამთავრებული პოპკულტურული პაროდიებით.

სარჩელის მიხედვით, როდესაც სვიფტმა და მისმა ლეიბლმა ალბომი გამოუშვეს, "ეს ჩუმად არ გაუკეთებიათ", სახელწოდება მალევე გამოჩნდა სხვადასხვა პროდუქტზე, შეფუთვებსა და მარკეტინგულ მასალებში, იმავე აუდიტორიაზე გათვლით, რომლის დაგროვებასაც უეიდი წლების განმავლობაში ცდილობდა.

დოკუმენტში აღნიშნულია, რომ როდესაც ტეილორ სვიფტმა სცადა The Life of a Showgirl-ის საკუთარი სავაჭრო ნიშნად რეგისტრაცია, აშშ-ის პატენტებისა და სავაჭრო ნიშნების ოფისმა განაცხადი უარყო, რადგან დაადგინა, რომ ის ზედმეტად ჰგავდა მარენ უეიდის უკვე არსებულ სავაჭრო ნიშანს და მომხმარებელთა დაბნეულობას გამოიწვევდა.

უეიდი ამტკიცებს, რომ სვიფტის მიერ სახელის გამოყენება მის ბრენდს "ჩრდილავს იმდენად, რომ მომხმარებლები ფიქრობენ, თითქოს ორიგინალი იმიტაციაა". მისი თქმით, მიუხედავად იმისა, რომ ამ სახელწოდებას 2014 წლიდან იყენებს, ახლა ბევრი ფიქრობს, რომ სწორედ მან "გაიმეორა" სვიფტის ალბომის სათაური.

თავის მხრივ, The Life of a Showgirl სვიფტის მე-12 ალბომია, რომელმაც გამოსვლისთანავე Spotify-ზე რეკორდები დაამყარა და 2025 წლის ერთ-ერთ ყველაზე გაყიდვად ალბომად იქცა. ამ ეტაპზე სვიფტს ორი გზა აქვს, ან შეისყიდოს სახელზე უფლებები, ან სასამართლოში გააგრძელოს დავა. სვიფტისა და მისი ლეიბლის წარმომადგენლებს კომენტარი ჯერჯერობით არ გაუკეთებიათ.