სამშაბათს დილით, კანადაში, ტორონტოში, აშშ-ის საკონსულოსთან სროლა იყო.

სამართალდამცავი ორგანოების ცნობით, ზარი ადგილობრივი დროით დილის 5:29 საათზე (09:29 GMT) შევიდა. ინციდენტის შესაძლო ეჭვმიტანილის ან მოტივის შესახებ ინფორმაცია ჯერ არ ვრცელდება.

როგორც BBC წერს, ტორონტოს პოლიციის უფროსის მოადგილემ, ფრენკ ბარედომ განაცხადა, რომ ადგილზე ჭურვები აღმოაჩინეს და შენობას დაზიანების კვალი ეტყობა. მისივე თქმით, დილით ადრე თეთრი მანქანა აშშ-ის საკონსულოს მიუახლოვდა, ორი მამაკაცი მანქანიდან გადმოვიდა და შენობას ესროლეს, შემდეგ ისინი მანქანაში დაბრუნდნენ და გაიქცნენ. შენობაში მყოფი პირები არ დაშავებულან.

ოფიციალურმა პირებმა განაცხადეს, რომ ტორონტოსა და ოტავაში აშშ-ისა და ისრაელის დიპლომატიურ წარმომადგენლობებში დამატებითი უსაფრთხოების ზომებია დაწესებული.

ცნობისათვის, კვირას, ოსლოში, აშშ-ის საელჩოსთან თვითნაკეთი ასაფეთქებელი მოწყობილობა აფეთქდა, ხოლო ნიუ-იორკში ორ მამაკაცს ტერორიზმში ბრალი წაუყენეს ანტიისლამური პროტესტის მონაწილეებზე თავდასხმის შემდეგ.

BBC-ის ცნობით, 28 თებერვალს, ირანის წინააღმდეგ აშშ-ისრაელის ოპერაციის დაწყების შემდეგ, ტორონტოში რამდენიმე შენობას ესროლეს, მათ შორის ებრაულ სინაგოგებს. ინციდენტების დროს არავინ დაშავებულა.