აშშ-ის ფინანსთა სამინისტრომ ირანის "ჩრდილოვან ფლოტს" ახალი სანქციები დაუწესა. ამის შესახებ ინფორმაციას Sky News ავრცელებს.

აშშ-ის ფინანსთა სამინისტრომ, ორ ქვეყანას შორის ჟენევაში დაგეგმილი მოლაპარაკებების წინ, ირანთან დაკავშირებული ახალი სანქციების დეტალები გააზიარა.

უწყების ვებგვერდზე გამოქვეყნებულ შეტყობინებაში ნათქვამია, რომ სანქციები დაუწესდა 30-ზე მეტ ფიზიკურ პირს, იურიდიულ პირსა და ირანთან დაკავშირებულ გემებს, რომლებიც "ჩრდილოვანი ფლოტის" ნაწილს შეადგენენ.

ფინანსთა სამინისტროს განცხადებით, ისინი ირანული ნავთობის უკანონო გაყიდვების ხელშეწყობისთვის, ასევე ირანის ბალისტიკური რაკეტებისა და თანამედროვე შეიარაღების წარმოებისთვის დასანქცირდნენ.

ფინანსთა მინისტრმა სკოტ ბესენტმა განაცხადა, რომ ირანი ფინანსურ სისტემებს უკანონო ნავთობის გასაყიდად, ბოროტად იყენებს

"ირანი ბოროტად იყენებს ფინანსურ სისტემებს უკანონო ნავთობის გასაყიდად, ამონაგების გასათეთრებლად, თავისი ბირთვული და ჩვეულებრივი შეიარაღების პროგრამებისთვის კომპონენტების მოსაპოვებლად და თავისი ტერორისტული მარიონეტების მხარდასაჭერად.

პრეზიდენტ ტრამპის ძლიერი ლიდერობით, ფინანსთა სამინისტრო ირანზე მაქსიმალური ზეწოლად გააძლიერებს, რათა მიზანში ამოიღოს რეჟიმის შეიარაღების შესაძლებლობები და ტერორიზმის მხარდაჭერა, რაც მან ირანელი ხალხის სიცოცხლეზე წინ დააყენა", — განაცხადა ბესენტმა.

ცნობისთვის, დონალდ ტრამპის სპეციალური წარმომადგენელი სტივ უიტკოფი და ჯარედ კუშნერი დღეს, 26 თებერვალს, შვეიცარიაში ირანის დელეგაციას თეირანის ბირთვული პროგრამის განსახილველად შეხვდებიან.