6 ნოემბერს, პატიმრობაში მყოფი ბათუმელებისა და ნეტგაზეთის დამფუძნებელი მზია ამაღლობელი გერმანიაში, ჰამბურგში, ნორვეგიულმა და გერმანულმა ორგანიზაციებმა — Fritt Ord Foundation-მა და ZEIT Stiftung Bucerius-მა თავისუფალი მედიის პრემიით დააჯილდოვეს. მას ჯილდო ეთიკისა და სიმართლის მიმართ 25-წლიანი ერთგულებისთვის გადაეცა. ამის შესახებ ინფორმაციას ბათუმელები ავრცელებს.

"მინდა იცოდეთ, რომ ეს პრიზი მარტო მე კი არა, ეკუთვნის ჩემს კოლეგებს, ყველა იმ ქართველ ჟურნალისტს, რომლებიც რეპრესიების პირობებში იცავენ და იბრძვიან სიტყვის თავისუფლებისთვის", — წერია მზია ამაღლობელის მოკლე გზავნილში, რომელიც დაჯილდოების ცერემონიაზე წაიკითხეს.

დაჯილდოებასთან დაკავშირებით გაკეთებულ განცხადებაში აღნიშნულია, რომ მზია ამაღლობელი "პირველი ქალი ჟურნალისტია, რომელიც საბჭოთა კავშირის დაშლის შემდეგ საქართველოში პოლიტიკურად მოტივირებული ბრალდებით დააპატიმრეს".

"ამ პერიოდში მან შექმნა ორი ყველაზე პოპულარული და სანდო პლატფორმა ქვეყანაში — "ბათუმელები" და "ნეტგაზეთი". ჟურნალისტური საქმიანობის გამო იგი არაერთხელ დაუპირისპირდა ხელისუფლებას. 2025 წელს მას ორი წლით თავისუფლების აღკვეთა მიუსაჯეს, რასაც ადამიანის უფლებათა დამცველი ორგანიზაციები პოლიტიკურად მოტივირებულს უწოდებენ. ის პირველი ქალი ჟურნალისტია, რომელიც საბჭოთა კავშირის დაშლის შემდეგ საქართველოში პოლიტიკურად მოტივირებული ბრალდებით დააპატიმრეს", — ნათქვამია განცხადებაში.

პრემია ჯამში ექვს დამოუკიდებელ მედიასაშუალებასა და ჟურნალისტს გადაეცა აღმოსავლეთ და ცენტრალური ევროპიდან.

თავისუფალი მედიის წლევანდელი ლაურეატების სიაში არიან:

  • მედიაპლატფორმა Gwara Media (უკრაინა);

  • ჟურნალისტი და მედიის დამფუძნებელი მზია ამაღლობელი (საქართველო);

  • საგამოძიებო ონლაინმედია Direkt 36 (უნგრეთი);

  • ფოტოგრაფი და ფოტოჟურნალისტი ალექსანდრა ასტახოვა (რუსეთი);

  • მედია არხი Belarusian Investigative Center (ბელარუსი);

  • ჟურნალისტი ნარგიზ აბსალამოვა (აზერბაიჯანი).

6 აგვისტოს, ბათუმის საქალაქო სასამართლოში მზია ამაღლობელს 2 წლით თავისუფლების აღკვეთა მიუსაჯეს. მზია ამაღლობელს ბრალი გადაუკვალიფიცირდა და 2 წლით პატიმრობა მიესაჯა. სანქცირებულმა მოსამართლე ნინო სახელაშვილმა ამაღლობელს ბრალდება 353-ე მუხლის პირველი ნაწილით გადაუკვალიფიცირა, რაც პოლიციის მუშაკისთვის წინააღმდეგობის გაწევასა და საზოგადოებრივი წესრიგის დაცვისთვის ხელის შეშლას გულისხმობს. პროკურატურა 6 თვე ამაღლობელს პოლიციელზე თავდასხმას ედავებოდა, რაც 4-დან 7 წლამდე პატიმრობას ითვალისწინებს.

სისხლის სამართლის კოდექსის 353-ე მუხლის პირველი ნაწილი 2-დან 4 წლამდე თავისუფლების აღკვეთას, შინაპატიმრობას ან ჯარიმის დაწესებას გულისხმობს — მოსამართლემ 7-თვიანი უკანონო პატიმრობის მიუხედავად, ამაღლობელს თავისუფლების აღკვეთა მიუსაჯა.