ცნობილი სერბი რეჟისორი ემირ კუსტურიცა რუსეთის მოქალაქეობის მიღება სურს. მის კომენტარს რუსული სამთავრობო მედია TASS ავრცელებს.

რეჟისორის თქმით, ის რუსეთის პასპორტის მიღებას ფილმ „ბოლო ვადაზე“ მუშაობის დასრულების შემდეგ გეგმავს. ფილმის სცენარი, რომელიც მწერალ ვალენტინ რასპუტინის ამავე სახელწოდების ნოველაზეა დაფუძნებული, უკვე დაწერილია.

"მერე, როდესაც შემდეგ გადაღებაზე ვიმუშავებ, [რუსულ პასპორტს] ავიღებ. [რუსეთის მოქალაქეობა] აუცილებლად იქნება", — ციტირებს კუსტურიცას TASS.

რეჟისორის მომავალ პროექტებს შორისაა ფილმები — "ლავრ", ევგენი ვოდოლაზკინის რომანის მიხედვით და "დანაშაული და სასჯელი" ფიოდორ დოსტოევსკის რომანის მიხედვით.

ადრე კუსტურიცამ რუს მსახიობ იურა ბორისოვს ევროპის ერთ-ერთი "მთავარი ტალანტი" უწოდა. ის მთავარ როლს შეასრულებს რეჟისორის ფილმში, რომლის გადაღებასაც დოსტოევსკის რომანის, "დანაშაული და სასჯელის" მიხედვით გეგმავს.