მონტანაში მდებარე ცხოველთა თავშესაფრიდან 70-ზე მეტი კატა და ძაღლი გაიყვანეს, ხოლო კვამლის ჩასუნთქვის გამო 14 თანამშრომელი სამკურნალოდ საავადმყოფოში მოხვდა — ეს კვამლი მეტამფეტამინის დაწვის შედეგად წარმოიშვა.

ტრინიტი ჰალვერსონი, რომელიც ბილინგსში (მონტანა) მდებარე ცხოველთა თავშესაფარს ხელმძღვანელობს, ოთხშაბათს ოფისის გარეთ იყო, როცა რაღაც "არასწორი სუნი" იგრძნო.

შენობაში შესვლისას დერეფნებში სქელი კვამლი შენიშნა და გაარკვია, რომ იმავე შენობაში, ქალაქის ცხოველთა კონტროლის სამსახურის ნარჩენების დანადგარში, რაღაც იწვოდა.

ჰალვერსონის თქმით, თავშესაფრის თანამშრომლებმა ნიღბები გაიკეთეს და თავშესაფარში მყოფი დაახლოებით 75 კატისა და ძაღლის ევაკუაცია დაიწყეს, სანამ რამდენიმე მათგანი ცუდად გახდებოდა. როდესაც ჰალვერსონი საავადმყოფოში აღმოჩნდა, ექიმებს აინტერესებდათ, რა იწვოდა იმ დანადგარში.

პასუხი საოცარი აღმოჩნდა: იქ FBI-მ მეტამფეტამინი დაწვა.

ჰალვერსონის თქმით, აქამდე არასდროს სმენია, რომ ფედერალური აგენტები ნარკოტიკებს იმ დანადგარში წვავდნენ, რომელიც ჩვეულებრივ ქალაქის ცხოველთა კონტროლის სამსახურის მიერ გამოიყენება ველური და შინაური, ევთანაზირებული ცხოველების ნარჩენების დასაწვავად. "მხოლოდ ჭორების დონეზე გვქონდა მოსმენილი, რომ იქ რაღაცას, რასაც ‘მტკიცებულებას’ ეძახდნენ, წვავდნენ," — თქვა მან ორშაბათს — "მაგრამ არასოდეს დადასტურებულა, რომ ეს ნარკოტიკები ან სხვა საშიში ნივთიერებები იყო, სანამ ოთხშაბათს საავადმყოფოში არ აღმოვჩნდი".

მისი თქმით, მან და იელოუსტოუნის ველის ცხოველთა თავშესაფრის კიდევ 13-მა თანამშრომელმა მკურნალობა გაიარეს მეტამფეტამინის კვამლის ჩასუნთქვის გამო. თითოეულ მათგანს ჰიპერბარიული ჟანგბადის კამერაში სამ-საათიანი თერაპია ჩაუტარდა. სამმა თანამშრომელმა მოგვიანებით სუნთქვის პრობლემების გამო განმეორებითი მკურნალობაც გაიარა.

ჰალვერსონის თქმით, დამწვარი მეტამფეტამინი სუნით ქლორს ჰგავდა. თანამშრომლები, რომლებიც ცხოველების ევაკუაციისას ერთი საათის განმავლობაში იმყოფებოდნენ ამ კვამლში, "გაოფლიანდნენ და თავბრუ ეხვეოდათ", ზოგიერთს კი შემდგომში თავის ტკივილიც დარჩა.

მისივე თქმით, კატებისა და ძაღლების უმეტესობა დროებით მზრუნველ ოჯახებთან გადაიყვანეს და ისინი კარგად გრძნობენ თავს.

ბილინგსის პოლიციის დეპარტამენტმა დაადასტურა, რომ ქალაქის საკუთრებაში არსებულ ნარჩენების დანადგარში FBI.-მ მეტამფეტამინი დაწვა. დეპარტამენტის განცხადებაში აღნიშნულია, რომ ის და სხვა სამსახურები ამ დანადგარს ნარკოტიკების გასანადგურებლად დიდი ხანია იყენებენ. დეპარტამენტმა თანამშრომლებს ცხოველების სწრაფი ევაკუაციისთვის მადლობაც გადაუხადა.

"FBI და ადგილობრივი სამართალდამცავები რეგულარულად იყენებენ გარე ობიექტებს ნარკოტიკული მტკიცებულებების კონტროლირებადი დაწვისთვის", — ნათქვამია FBI-ს წარმომადგენლის, სანდრა ბარკერის განცხადებაში.

ჰალვერსონის თქმით, დეზინფექციის სპეციალისტები ვარაუდობენ, რომ თავშესაფრის თანამშრომლები და ცხოველები შენობაში ჯერ ვერ დაბრუნდებიან. თავშესაფარი უკვე აგროვებს შემოწირულობებს ამ დროის გადასატანად.

"გვეშინია", — თქვა მან განცხადებაში. "გულგატეხილები ვართ, მაგრამ ასევე საზოგადოების სიყვარულს და მხარდაჭერას ვგრძნობთ, რისთვისაც უზომოდ მადლიერები ვართ".